وہاب نے اعظم کے قدم روک دیے، یونائیٹڈ کو زلمی سے شکست
کراچی:(عاقب ابراہیم غوری سے ) پی ایس ایل 7 کے 24ویں میچ میں پشاور زلمی نے اسلام آباد یونائیٹڈ کو شکست دے دی۔
تفصیلات کے مطابق پشاور زلمی نے اسلام آباد یونائیٹڈ کو 10 رنز سے شکست دے دی، اعظم خان کی 85 رنز کی دھواں دار اننگز بھی یونائیٹڈ کو شکست سے نہ بچاسکی۔
اسلام آباد یونائیٹڈ کی ٹیم 207 رنز کے تعاقب میں مقررہ اوورز میں 7 وکٹوں کے نقصان پر 196 رنز بناسکی، رحمان اللہ گرباز 46۔ رنز کے ساتھ نمایاں رہے
کپتان آصف علی 11 رنز بنا کر پویلین لوٹ گئے، فہیم اشرف 9 رنز بنا کر آؤٹ ہوئے۔
زلمی کی جانب سے سلمان ارشاد نے دو وکٹیں حاصل کیں جبکہ وہاب ریاض نے دو کھلاڑیوں کو پویلین کی راہ دکھائی۔
اس سے قبل پشاور زلمی نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 206 رنز بنائے اور یونائیٹڈ کو جیت کے لیے 207 رنز کا ہدف دیا تھا۔
اوپنر بلے باز محمد حارث نے 32 گیندوں پر 70 رنز کی جارحانہ اننگز کھیلی، یاسر خان نے 35 رنز بنائے، حضرت اللہ زازائی 13 رنز بنا کر آؤٹ ہوئے۔
شیرفین ردر فورڈ 16 رنز بنا کر فہیم اشرف کا نشانہ بنے، شعیب ملک 38 رنز کی ذمہ دارانہ اننگز کھیلی، یونائیٹڈ کی جانب سے فہیم اشرف، وقاص مقصود، ظاہر خان اور لیام ڈوسن نے ایک، ایک وکٹ حاصل کی۔
قبل ازیں وہاب ریاض نے ٹاس جیت کر آصف علی الیون کو پہلے بولنگ کی دعوت دی ہے۔
اسلام آباد یونائیٹڈ کی ٹیم میں پانچ تبدیلیاں کی گئی ہیں، یونائیٹڈ کپتان شاداب خان اور الیکس ہیلز کی خدمات سے محروم ہیں، زلمی نے ایک تبدیلی کرتے ہوئےمحمد عمر کی جگہ یاسر خان کو اسکواڈ کا حصہ بنایا ہے۔