حکومت شفاف انتخابات کے انعقاد کیلئے ہرطرح سے الیکشن کمیشن کے ساتھ تعاون کرے گی،وفاقی وزیرشبلی فراز
اسلام آباد (یاسر ملک سے ):وفاقی وزیر برائے سائنس و ٹیکنالوجی سینیٹر شبلی فراز نے کہا ہے کہ پاکستان تحریک انصاف (پی ٹی آئی) حکومت الیکٹرانک ووٹنگ مشین (ای وی ایم) کے ذریعے 2023 کے عام انتخابات کا انعقاد کرانے کیلئے پر عزم ہے، ملک کے آئین و قانون پر عمل درآمد کرتے ہوئے ای وی ایم کے ذریعے انتخابات کروانا الیکشن کمیشن آف پاکستان کی ذمہ داری ہے۔
نجی ٹی وی چینل سے گفتگو کرتے ہوئے انہوں نے کہا کہ وزیراعظم عمران خان کی ولولہ انگیز قیادت میں موجودہ حکومت انتخابی نظام میں شفافیت کو یقینی بنانے کیلئے اگلے انتخابات ای وی ایم کے ذریعے کرائے گی تاکہ لوگوں کا اعتماد بحال ہو سکے۔ سینیٹر شبلی فراز نے کہا کہ حکومت نے انتخابی اصلاحات، ای وی ایم اور آئی ووٹنگ کے حوالے سے قانون سازی کر لی ہے، اب الیکشن کمیشن کو چاہیے کہ آزادانہ، منصفانہ اور شفاف انتخابات کے انعقاد کیلئے تمام تر ضروری اقدامات اٹھائے،
حکومت شفاف انتخابات کے سلسلے میں ہر طرح سے الیکشن کمیشن کے ساتھ تعاون کرے گی۔ جسٹس (ر) وجیہ الدین کے بیان پر تبصرہ کرتے ہوئے انہوں نے کہا کہ وجیہ الدین کے الزامات بے بنیاد ہیں اور میرے نزدیک ان کے بیان کی کوئی اہمیت نہیں ہے۔
