دکھی انسانیت کی خدمت کرکے ہم اللہ تعالی کی خوشنودی حاصل کر سکتے ہیں.سید یاورعباس بخاری
بہاول پور(واصب ابراہیم غوری سے )صوبائی وزیر سوشل ویلفیئراینڈبیت المال پنجاب سید یاورعباس بخاری نے کہا ہے کہ دکھی انسانیت کی خدمت کرکے ہم اللہ تعالی کی خوشنودی حاصل کر سکتے ہیں اور حکومت کے ساتھ ساتھ ہیلپنگ ہینڈ فار ریلیف اینڈ ڈویلپمنٹ اور الخدمت فاؤنڈیشن جیسے دیگر فلاحی ادارے بھی انسانیت کی خدمت میں کوشاں ہیں۔ وہ آج یہاں ہیلپنگ ہینڈ فار ریلیف اینڈ ڈویلپمنٹ جنوبی پنجاب کے زیر اہتمام آرفن کیئر پروگرام کی سالانہ تقریب تقسیم انعامات سے خطاب کر رہے تھے۔ صوبائی وزیرسوشل ویلفیئر اینڈ بیت المال پنجاب سید یاورعباس بخاری نے کہا کہ ہمیں ایک باوقار قوم کے ذمہ دار شہری ہونے کی حیثیت سے انفرادی اور اجتماعی طور پر عوامی خدمت کرنی ہے اورارض پاک کو ترقی کی معراج پرلے کر جانا ہے اور یہی وزیر اعظم پاکستان عمران خان کا وژن ہے۔
صوبائی وزیر نے کہا کہ سپیشل بچوں کی فلاح و بہبود اور ان کی ہر طرح سے معاونت ہم سب کی ذمہ داری اور فرض ہے جس پر عمل پیرا ہو کر ہم اللہ تعالیٰ کی خوشنودی حاصل کر سکتے ہیں۔صوبائی وزیر نے مزیدکہا کہ حکومت پنجاب سپیشل افرادکو ملک کا مفید اور کارآمد شہری بنانے کے لیے پر عزم ہے اور سوشل ویلفیئر کے ادارہ نشیمن جیسے دیگر فلاحی ادارے بنا کر انقلابی اقدامات بروئے کار لا رہی ہے۔تقریب سے الخدمت فاؤنڈیشن بہاول پور کے سرپرست سید ذیشان اختر نے بھی خطاب کیا۔انہوں نے کہا کہ ہیلپنگ ہینڈاور الخدمت فاؤنڈیشن جیسے ادارے انسانیت کی خد مت کے لئے قابل رشک اور قابل ستائش عملی اقدامات پر عمل پیرا ہیں جس کے لئے ان اداروں کی ٹیمیں مبارکباد کی مستحق ہیں۔ہیلپنگ ہینڈ جنوبی پنجاب کے منیجر یوتھ افیئر اینڈ ایجوکیشن راحیل بھٹی نے تقریب سے خطاب کرتے ہوئے بتایا کہ ہیلپنگ ہینڈ ملک بھر کے 48 اضلاع میں اس وقت 9 ہزار بچوں کی مکمل کفالت کر رہا ہے اورگذشتہ سال 4 ارب روپے فلاحی کاموں پر خرچ کیے گئے ہیں جنہیں اس سال بڑھا کر 5 ارب روپے کر دیا گیا ہے۔انہوں نے مزید کہا کہ انسانیت کی خدمت کے حوالہ سے ہیلپنگ ہینڈ کے فلاحی کاموں میں حکومتی سرپرستی بھی شامل ہے۔ تقریب کے آخر میں صوبائی وزیر سوشل ویلفیئر اینڈ بیت المال پنجاب سید یاور عباس بخاری نے تعلیمی میدان میں پوزیشن ہولڈر ز طلباء و طالبات میں لیپ ٹاپ،نقد انعامات اور دیگر انعامات تقسیم کیے۔ اس موقع پر ڈائریکٹر سوشل ویلفیئربہاول پور سحر صدیقہ،ڈپٹی ڈائریکٹرسوشل ویلفیئر محمد عذیر،جودت کامران،ڈسٹرکٹ کوآرڈی نیٹر نوید احمد قائم خانی بھی موجود تھے۔
