سوشل ویلفیئراوربیت المال ادارے کےافسران وسٹاف لوگوں کی فلاح وبہبود کےکاموں میں بھرپورتوجہ دیں۔ سید یاورعباس بخاری
بہاول پور(عمران قذافی سے ) صوبائی وزیر سوشل ویلفیئر اینڈ بیت المال سید یاور عباس بخاری نے بہاول پور کا دورہ کیا۔ انہوں نے ڈائریکٹر سوشل ویلفیئر بہاول پور کے دفتر میں اجلاس کی صدارت کی۔ اس موقع پر سوشل ویلفیئر اینڈ بیت المال کے افسران موجود تھے۔ صوبائی وزیر نے کہا کہ لوگوں کی فلاح و بہبود اور ان کی دیکھ بھال کے کاموں میں بھرپور توجہ دی جائے۔ انہوں نے کہا کہ سوشل ویلفیئر اینڈ بیت المال ادارے کے افسران و سٹاف فعال انداز میں کام کریں۔ انہوں نے کہا کہ سوشل ویلفیئر میڈیکل آفیسرز ہسپتالوں میں آنے والے مریضوں کے علاج معالجے اور ان کی دیکھ بھال کے کاموں میں اپنا کلیدی کردار ادا کریں۔ انہوں نے کہا کہ محکمہ سوشل ویلفیئر اینڈ بیت المال میں جاری ترقیاتی منصوبہ جات اعلیٰ معیار کے ساتھ بروقت مکمل کئے جائیں اور افسران موقع پر ترقیاتی کاموں کی نگرانی کریں۔ صوبائی وزیر نے سوشل ویلفیئر ادارہ جات کے افسران کی انفرادی کارکردگی کا جائزہ لیا۔ انہوں نے ہدایت کی سوشل ویلفیئر افسران جذبہ حب الوطنی سے سرشار ہوکر لوگوں کی خدمت کریں۔ اس موقع پر ڈائریکٹر سوشل ویلفیئر سحر صدیقہ نے محکمہ سوشل ویلفیئر اینڈ بیت المال کے مختلف شعبہ جات کی کارکردگی اور جاری ترقیاتی کاموں کے بارے میں بریفنگ دی۔انہوں نے بتایا کہ بہاول پور میں پناہ گاہ کی تعمیر کا کام تکمیل کے مراحل میں ہے۔ اس منصوبے کا تخمینہ لاگت ساڑھے چار کروڑ روپے ہے۔ انہوں نے کہا کہ دارالاطفال زنانہ و مردانہ میں تین کروڑ روپے کی لاگت سے ترقیاتی کام کرائے جا رہے ہیں جبکہ صنعت زار بہاول پور میں کانفرنس ہال اور کلاس رومز کی تعمیر کے کام کیے گئے ہیں جن کا تخمینہ لاگت70 لاکھ روپے ہے۔بعد ازاں صوبائی وزیر سوشل ویلفیئر اینڈ بیت المال سید یاور عباس بخاری نے چیئرمین ضلع بیت المال کمیٹی سید صلاح الدین سے ملاقات کی۔ اس موقع پر ممبر کمیٹی اعجاز بخاری اور ڈپٹی ڈائریکٹر سوشل ویلفیئر محمد عزیر موجود تھے۔ چیئرمین ضلعی بیت المال کمیٹی نے ادارہ کی کارکردگی سے آگاہ کیا۔