ملک میں مہنگائی کی مجموعی شرح بڑھ کر 30.68 فیصد پر پہنچ گئی
یوتھ ویژن نیوز ( عاقب غوری سے ) ملک میں مہنگائی کی مجموعی شرح 30.68 فیصد پر پہنچ گئی ہے ۔ ادارہ شماریات کی ہفتہ وار مہنگائی رپورٹ میں بتایا گیا ہے کہ حالیہ ہفتے میں 21اشیاء کی قیمتوں میں اضافہ ہوا، ایک ہفتے میں 14اشیاء کی قیمتوں میں استحکام رہا۔ رپورٹ میں بتایا گیا کہ حالیہ ہفتے بجلی کی قیمت میں 89.34 فیصد اضافے کے ساتھ فی یونٹ کی قیمت3.47 سے بڑھ کر6.57 روپے ہوگئی۔
انرجی سیور کی قیمت 1.57 فیصد بڑھی، جلانے والی لکڑی 1.31 فیصد مہنگی ہوئی جبکہ حالیہ ہفتے چائے، چاول، لہسن، آٹا، گھی، مٹن کی قیمتوں میں اضافہ دیکھا گیا۔ اسی طرح ٹماٹر 3.77، پیاز 2.97 فیصد اور دال مسور، چکن، گڑ، دال ماش، ایل پی جی، آلو سستے ہوئے۔ لاہورنیوز کے مطابق لاہور میں 8 سبزیوں اور 9 پھلوں کی قیمتوں میں اضافہ ہوا۔
ٹماٹر 25 روپے مہنگے ہوکر 195روپے کلو مقرر، مٹر 10روپے، کریلے، پالک 5 روپے، میتھی، بینگن، پھول گوبھی اورکھیرے 3 روپے مہنگے ہوئے، پھلوں میں سیب کالا کولو 5روپے، پپیتا 10، کھجورایرانی 15، انگورسندرخانی کی قیمت میں 12 روپے کا اضافہ، انار بدانہ اور ناشپاتی 10روپے، امرود 5 روپے کلو اور کیلا درجہ اول 5 روپے فی درجن مہنگے ہوئے۔
دوسری جانب پاکستان کی چین کو برآمدات رواں سال کے پہلے نو مہینوں میں 2.57 بلین امریکی ڈالر سے تجاوز کر گئیں جو کہ سال بہ سال 2 فیصد زیادہ ہے۔عوامی جمہوریہ چین کے کسٹمز کی جنرل ایڈمنسٹریشن کے سرکاری اعداد و شمار کے مطابق پاکستان کی برآمدات میں سالانہ بنیادوں پر ہر ماہ اضافہ ہو رہا ہے اور پاکستانی حکومت چین کو برآمدات بڑھانے اور تجارتی خسارے کو کم کرنے کے لیے سخت محنت کر رہی ہے۔
جی اے سی سی کے اعداد و شمار کے مطابق ستمبر کے مہینے میں پاکستان کی چین کو برآمدات 182.18 ملین امریکی ڈالر سے تجاوز کر گئیں جبکہ گزشتہ سال اسی مہینے میں یہ 257.47 ملین ڈالر تھی جس سے ظاہر ہوتا ہے کہ سیلاب نے دنیا بھر میں پاکستان کی برآمدات کو بری طرح متاثر کیا۔ مجموعی طور پر جنوری سے ستمبر 2022 تک پاکستان سے چین کی درآمدات اور برآمدات میں سالانہ 3 فیصد اضافے کے ساتھ 20.19 بلین امریکی ڈالر کا اضافہ ہوا جبکہ 2021 کے اسی عرصے میں یہ 19.60 بلین امریکی ڈالر تھا، جبکہ ستمبر کے مہینے میں پاکستان کی چین کو برآمدات میں کمی واقع ہوئی۔
چین کو بڑی مصنوعات کی برآمدات میں اضافہ ہوا جیسے چاول، زنک ایسک اور کنسنٹریٹ، تیل کے بیج اور اولیگینس پھل، تل کے بیج، پائن نٹس، سمندری غذا اور دیگر زرعی مصنوعات شامل ہیں۔