14اگست کا دن پاک وہند کےمسمانوں کےعزم صصیم اورجہد مسلسل کی یاد دلاتا ہے،ڈاکٹر شازیہ انجم
بھاولپور (علی رضا غوری سے ):14 اگست کا دن ہمیں برصغیر پاک وہند کے مسلمانوں کے عزم صمیم اور جہدِ مسلسل کی یاد دلاتا ہے۔ ڈاکٹر شازیہ انجم
پروفیسر ڈاکٹر نوید اختر وائس چانسلر اسلامیہ یونیورسٹی بہاول پور کی ہدایت پر جامعہ اسلامیہ میں یوم آزادی کی تقریبات جاری ہیں۔اس سلسلے میں شعبہ پولیٹیکل سائنس اسلامیہ یونیورسٹی بہاول پور کے زیر اہتمام جشن آزادی کی تقریبات کے سلسلے میں ایک سیمینار منعقد کیا گیا۔
یہ بھی پڑھیں: اسلامیہ یونیورسٹی بھاولپورمیں خزاں2023 کی داخلہ مہم کا آغاز ہوگیا
سیمینار کی صدارت پروفیسر ڈاکٹر شازیہ انجم ڈین فیکلٹی آف کیمیکل اینڈ بائیولوجیکل سائنسز نے کیا۔ تقریب سے خطاب کرتے ہوئے پروفیسر ڈاکٹر شازیہ انجم کاکہنا تھا کہ 14 اگست کا دن ہمیں برصغیر پاک وہند کے مسلمانوں کے عزم صمیم اور جہدِ مسلسل کی یاد دلاتا ہے۔
اس دن مسلمانانِ ہند قائدا عظم محمد علی جناح کی ولولہ انگیز قیادت میں اپنے لیے ایک الگ خطہ ارضی کے حصول میں کامیاب ہوئے۔ بے مثال قیادت اور ایمان، اتحاد ویقین محکم کے اُصولوں پر عمل پیرا ہو کر ہمارے آباؤ اجداد نے فقط سات برس کے عرصے میں دنیا کے نقشے کو بدل کر رکھ دیا۔ پاکستان کی صورت میں ایک نئی اسلامی مملکت معرضِ وجود میں آئی۔
پروفیسر ڈاکٹر مصور حسین بخاری چیئرمین شعبہ پولیٹیکل سائنسز نے کہا کہ برصغیرکے مسلمان انگریزوں کی غلامی سے نجات کرنے کے بعد ہندو اکثریت کے غلام نہیں بننا چاہتے تھے اسی وجہ سے علامہ اقبال نے 1930 میں الہ آباد کے جلسے میں میں اس خیال کا اظہار کیا تھا کہ برصغیر کے مسلمانوں کی آزاد الگ ریاست ہو گی جس میں وہ اسلام کے سنہری اصولوں کے مطابق زندگی گزار سکیں گے۔ انگریز برصغیر کو آزاد ی تو دیناچاہتے تھے لیکن مسلمانوں کو علیحدہ مملکت نہیں دینا چاہتے تھے لیکن برصغیر کے مسلمانوں نے لازوال قربانیاں دے کر خون سے، شہیدوں کے لہو سے پاکستان کو حاصل کیا پاکستان کے قیام کا مقصد یہ تھا کہ برصغیر کے مسلمان اپنے علیحد ہ مذہبی ثقافتی تشخص اور اپنی مستقبل کے بہتری کے لئے اپنے فیصلے خود کر سکیں۔
شرکاء کاکہنا تھا کہ ہم اپنے بزرگوں کی قربانیوں کو ان کی جدوجہد کو ہرگز نہ بھولیں گے اور اس مقصد کے حصول کے لیے پاکستان کو ایک عظیم مملکت بنا کر رہیں گے پچھلے 75 سالوں میں پاکستان نے بے تحاشا کامیابیاں حاصل کی ہیں۔ہمیں ایک روشن مستقبل کے لئے مل جل کر پاکستانیوں کی حیثیت سے کام کرنا چاہیے۔ڈاکٹر سمیعہ خالد چیئرپرسن شعبہ تاریخ، پروفیسر ڈاکٹر روزینہ انجم نقوی چیئرپرسن شعبہ فارسی نے بھی خطاب کیا۔ تقریب میں ڈاکٹر سعید احمد، شہنہرہ محمود چیف پبلک ریلیشنز آفیسر، فاطمہ مظاہر ڈپٹی رجسٹرار پبلک افیئرز، فیکلٹی، افسران اور طلباء وطالبات نے شرکت کی۔
