ٹوئٹر پر تین طرح کے اکاؤنٹس متعارف کرائے جانے کا امکان
یوتھ ویژن نیوز (عاقب غوری سے )ایلون مسک کی جانب سے ٹوئٹر کا کنٹرول سنبھالے جانے کے بعد جہاں ٹوئٹر بلیو ٹِک کیلئے ماہانہ 8 ڈالر فیس کی وصولی کا اعلان کیا گیا ہے، وہیں اب خبر سامنے آئی ہے کہ ٹوئٹر پر تمام اکاؤنٹس کو تین مختلف کیٹیگریز میں تقسیم کیا جائے گا۔
اس وقت ٹوئٹر بلیو نامی سروس کی سربراہ ایسٹر کرافورڈ نے تصدیق کی ہے کہ پلیٹ فارم پر تین کیٹیگریز کے اکاؤنٹس متعارف کرائے جانے کا امکان ہے۔
امریکی نشریاتی ادارے ’سی این بی سی‘ کے مطابق ٹوئٹر کی پراڈکٹ منیجر اور ٹوئٹر بلیو کی ہیڈ نے اس بات کی بھی تصدیق کی کہ اب ٹوئٹر پر بلیو ٹِک حاصل کرنے کیلئے پہلی کی طرح اپنی شناخت ظاہر کرنے کیلئے تحریریں یا دوسرے قانونی دستاویزات فراہم نہیں کرنے پڑیں گے۔
یہ بھی پڑھیں: میڈیکل سٹوڈنٹس کیلئےایم ڈی کیٹ کا ٹیسٹ کل ہوگا
ان کی جانب سے بتائی گئی باتوں کے مطابق اب ٹوئٹر پر ہر صارف کو ماہانہ 8 ڈالر فیس کے عوض بلیو ٹِک دیے جانے کا امکان ہے۔
انہوں نے بتایا کہ اسی طرح جن افراد یا اداروں کے پاس پہلے سے ہی بلیو ٹِک موجود ہے اور جب ان سے ماہانہ فیس وصول کی جائے گی تو ان کے اکاؤنٹ کے آگے ’آفیشل‘ کا لیبل بھی نظر آئے گا۔
ایسٹر کرافورڈ نے بتایا کہ نئے منصوبے کے تحت ٹوئٹر پر موجود تمام اکاؤنٹس کو تین اقسام یا کیٹیگریز میں تقسیم کردیا جائے گا، جس میں سے ایک ’آفیشل، دوسرا بلیو ٹِک جب کہ تیسرا ’ان لیبلڈ‘ اکاؤنٹ ہوگا۔
انہوں نے مزید بتایا کہ نئے منصوبے کے تحت صارفین پر ٹوئٹر بلیو کی سروس حاصل کرنے کیلئے کوئی دباؤ نہیں ڈالا جائے گا بلکہ وہ ماہانہ فیس دینے یا نہ دینے سے متعلق آزاد ہوں گے لیکن جو لوگ سروس کو سبسکرائب نہیں کریں گے، ان کا اکاؤنٹس ’ان لیبلڈ‘ رہیں گے۔
ان کے مطابق ’آفیشل‘ کی کیٹیگریز میں تمام ادارے، تنظیمیں، سربراہ اور معروف شخصیات کو شامل کیا جائے گا، ممکن ہے کہ بعض عام صحافیوں اور کارکنان کو بھی مذکورہ کیٹیگری میں شامل کیا جائے۔
یہ بھی پڑھیں: میٹا نے13فیصد ملازمین کم کرنےکا فیصلہ کرلیا
انہوں نے یہ واضح نہیں کیا کہ نئے منصوبے پر کب تک عملدآرمد ہوگا، تاہم انہوں بتایا کہ اس پر تیزی سے کام جاری ہے۔
نئی تفصیلات سے قبل ایلون مسک نے اعلان کیا تھا کہ تمام بلیو ٹِک رکھنے والے اکاؤنٹس کو ماہانہ 8 ڈالر کی فیس ادا کرنی ہوگی، دوسری صورت میں ان کا بلیو ٹِک ہٹا دیا جائے گا۔
تاہم بعد ازاں یہ اطلاعات آئیں کہ تمام صارفین کو ماہانہ 8 ڈالر فیس کے عوض بلیو ٹِک دیے جانے کا امکان بھی ہے اور اب یہ خبر سامنے آئی ہے کہ ٹوئٹر کے تمام اکاؤنٹس کو تین کیٹیگریز میں تقسیم کر دیا جائے گا۔
ایلون مسک نے گزشتہ ماہ 28 اکتوبر کو ٹوئٹر کا کنٹرول سنبھالا تھا، انہوں نے اپریل 2022 میں ٹوئٹر کو 44 ارب ڈالر میں خریدا تھا، اب پلیٹ فارم واحد ان کی ملکیت ہے، پہلے اس کے متعدد شیئر ہولڈرز تھے۔
