آسٹریلیا کا پاکستان کےسیلاب متاثرین کیلئے30لاکھ ڈالرز امداد کا اعلان
آسٹریلیا نے پاکستان میں سیلاب متاثرین کے لیے مزید 30 لاکھ ڈالرز امداد کا اعلان کر دیا۔
آسٹریلین وزیر برائے بین الاقوامی ترقی پیٹ کونرے نے اپنے ایک بیان میں کہا کہ تباہ کن سیلاب نے 33 ملین سے زیادہ افراد کو متاثر کیا اور سیلاب سے مزید زندگیاں، خوراک اور فصلیں متاثر ہونے کے خدشات ہیں۔
یہ بھی پڑھیں: نئےآرمی چیف کی تقرری کب ہوگی؟وزیردفاع نےسب بتا دیا
انہوں نے کہا کہ ملک کا ایک تہائی سے زیادہ حصہ سیلاب میں ڈوبا ہوا ہے، آسٹریلین حکومت کو پاکستان کے سیلاب سے متاثرین کے ساتھ دلی ہمدردی ہے اور آسٹریلوی امداد عالمی خوراک پروگرام کے تحت دی جائے گی۔
واضح رہے کہ گزشتہ ماہ آسٹریلیا کی جانب سے پاکستان کے سیلاب متاثرین کے لیے 20 لاکھ ڈالرز کی امداد کا اعلان کیا گیا تھا، آسٹریلیا کی اضافی امداد کے بعد اس کی کل امداد 5 ملین ڈالر تک پہنچ جائے گی۔
وزیر اعظم شہباز شریف نے سیلاب متاثرین کی امداد پر آسٹریلیا کی حکومت اور عوام سے تشکر کا اظہار کیا تھا۔
یہ بھی پڑھیں: ڈاکوؤں نے ہسپتال کو بھی لوٹ لیا ،1200 ڈینگی لیب کٹس چوری
آسٹریلیا کے محکمہ خارجہ وتجارت کی جانب سے جاری بیان میں کہا گیا تھا کہ آسٹریلیا نے پاکستان میں تباہ کن سیلاب پر ہنگامی انسانی مدد کے تحت مالی معاونت کا اعلان کیا اور آسٹریلیا کی جانب سے امداد ورلڈ فوڈ پروگرام کے ذریعے فراہم کی جائے گی۔
