ثقافتی عناصر معاشرے میں امن، برداشت اور رواداری کو فروغ دیتے ہیں,محمد زبیر ربانی
بہاولپور(واصب ابراہیم غوری سے ) ثقافتی عناصر معاشرے میں امن، برداشت اور رواداری کو فروغ دیتے ہیں۔کلچر معاشرے کے خوبصورت رنگوں کو نمایاں کرتا ہے. پنجاب رنگا رنگ ثقافتوں کی سرزمین ہے جسکا ہر رنگ دوسرے رنگ سے ممتاز اور حسین ہے۔ محبت، یگانگت، مہمان نوازی اور خلوص یہاں کا خاصہ ہیں۔ ان خیالات کا اظہار ڈائریکٹر بہاولپور میوزیم محمد زبیر ربانی نے پنجاب کلچر ڈے کے موقع پر کیا۔ اس موقع پر انھوں نے قومی لباس پگڑی اور سرائیکی اجرک زیب تن کر کے اپنے دفتری امورانجام امور سرانجام دئیے اور سٹاف نے بھی اس دن کی مناسبت سے اپنے ملبوسات سے یہاں کے ثقافتی رنگوں کو اجاگر کیا۔
محمد زبیر ربانی نے کہا کہ پنجاب ادب، تصوف اور محبت کی سرزمین ہے۔ یہ خوش نصیب خطہ دریاؤں کا وارث اور ہزاروں سال پرانی تہذیبوں کا امین ہے۔یہاں کی تہذیب نے دنیا کو انسانی قدروں کی اہمیت کا احساس دلایا۔ ہڑپہ سے ٹیکسلا تک یہ خطہ ثقافتی تہوار، روایتی کھانے، ملبوسات، دست کاریوں ،تاریخی مقامات اور ریگستانی سلسلے کے حسین رنگوں سے رنگا ہے جو یہاں کی ثقافت کو متنوع بناتا ہے۔ انھوں نے کہا کہ وزیر اعلیٰ پنجاب سردار عثمان بزدار کے ثقافت دوست اقدامات سے پہلی بار نہ صرف کلچرل پالیسی بنائی گئی بلکہ گزشتہ دو سالوں سے پنجاب کلچر ڈے منانے کی جو طرح رکھی گئی ہے وہ قابل ستائش و قابل اطمینان ہے۔ محمد زبیر ربانی نے کہا کہ اس طرح کے اقدامات سے ثقافتی سرگرمیوں کو فروغ حاصل ہوگا اور بھائی چارے کی فضا عام ہوگی۔ ڈائریکٹر میوزیم نے مزید کہا کہ پنجاب حکومت کی تاریخ، تہذیب و ثقافت سے دلچسپی کی بدولت میوزیم کے تشتہ تکمیل منصوبے برق رفتاری سے اپنی تکمیل کے سفر پر گامزن ہیں۔ انھوں نے کہا کہ بہاولپور میوزیم نے ہمیشہ ایسے پروگراموں کے انعقاد کو یقینی بنایا ہے جو قومی و علاقائی ثقافت، زبان، ادب اور فنون لطیفہ کی ترویج میں معاون ہیں۔ تاہم میوزیم کے زیر تعمیر منصوبہ جات کی تکمیل کے بعد ان پروگراموں میں مزید اضافہ ہوگا۔
