پناہ گاہوں میں صحت سہولت کارڈ کے بارے میں آگاہی مہم کا آغازہوگیا۔ نسیم الرحمن
اسلام آباد ( واصب ابراہیم غوری سے ) وزیر اعظم کے فوکل پرسن برائے پناہ گاہ نسیم الرحمن نے بتایا ہے کہ انھوں نے تمام پناہ گاہوں میں صحت سہولت کارڈ کے بارے میں آگاہی مہم کا آغاز کر دیا ہے۔ انھوں نے میڈیا کو بتایا کہ پناہ گاہوں میں آنے والے ذیادہ تر مسافروں کو صحت سہولت کارڈ کے بارے میں مکمل آگاہی نہیں تھی۔ انھوں نے کہا کہ ہماری آگاہی مہم سے انکی معلومات میں خاطر خواہ اضافہ ہوا ہے۔ آگاہی مہم کیلئے باقاعدہ سروے فارم ڈیزائن کیا گیا جسے پناہ گاہ میں آنے والے افراد سے ملنے والی معلومات کی بنا پر مکمل کیا گیا۔ ہر پناہ گاہ میں سینکڑوں سروے فارم مکمل کئے گئے جن کے اعدادوشمار کا رزلٹ ترتیب دیا جا ریا ہے۔ اس سروے کی بنا پر صحت پروگرام کیلئے عوام سے فیڈ بیک ملے گا جس سے مزید پالیسی سازی میں مدد ملے گی۔ نسیم الرحمن نے کہا کہ یہ صحت کے شعبے میں ایک انقلابی قدم ہے اور غریب عوام کو دی جانے والی یہ سہولت وزیر اعظم عمران خان کا غریب عوام کیلئے ایک شاندار تحفہ ہے اور صحت کا ایسا نظام صرف چند ترقی یافتہ ملکوں ہی میں رائج ہے۔ انھوں نے مزید کہا کہ حکومت اس پروگرام کے دائرہ کار کو بتدریج بڑھا رہی ہے۔ صحت سہولت کارڈ سے نہ صرف سرکاری بلکہ مکمل جائزہ کے بعد منتخب کردہ پرائیویٹ ہسپتالوں سے بھی علاج معالجہ کی سہولت حاصل کی جا سکتی ہے۔ وزیر اعظم کے فوکل پرسن نے کہا کہ وہ پرائیویٹ ہسپتالوں کا بذات خود بھی جائزہ لے رہے ہیں کہ وہ صحت کارڈ کے مستحقین کو کس طریقہ کار کے تحت علاج معالجہ کی سہولیات فراہم کریں گے۔ یاد رہے کہ صحت کارڈ سے صرف ان ڈور ٹریٹمنٹ کی سہولت حاصل ہو گی اور اس میں سرجری سے متعلقہ بڑی بیماریوں جیسے کینسر، جگر دل کے امراض وغیرہ کے علاج کیلئے دس لاکھ تک کی رقم کی سہولت مہیا کی گئی ہے۔ اس سے قبل ان بیماریوں کے علاج کیلئے غریب لوگ مقروض ہو جاتے تھے لیکن اب پی ٹی آئی کی موجودہ حکومت لوگوں کو عملی ریلیف دے کر ان کیلئے آسانیاں پیدا کرنے کی کوشش کر رہی ہے۔ نسیم الرحمن نے کہا کہ احساس پروگرام اور صحت سہولت جیسے پروگراموں کی بدولت حکومت بجا طور پر عوام کے احساسات کی ترجمانی کر رہی ہے۔