آبادی میں تیزی سے اضافے سے ملک کی سماجی و اقتصادی ترقی پر اثرات مرتب ہو رہے ہیں ، صدر مملکت ڈاکٹر عارف علوی
اسلام آباد۔(ثاقب ابراہیم غوری سے ):صدر مملکت ڈاکٹر عارف علوی نے کہا ہے کہ آبادی میں تیزی سے اضافے سے ملک کی سماجی و اقتصادی ترقی پر اثرات مرتب ہو رہے ہیں ،لوگوں میں شعور بیدار کرنے کے لیے قومی سطح پر ایک وسیع البنیاد مہم چلانے کی ضرورت ہے ، میڈیا خاندانی منصوبہ بندی پر رائے عامہ ہموار کرنے ، رویوں میں تبدیلی لانے میں اہم کردار ادا کر سکتا ہے۔ ان خیالات کا اظہار انہوں نے جمعہ کو آبادی میں تیزی سے اضافے پر میڈیا نمائندگان کے ساتھ فکری نشست کے دوران گفتگو کرتے ہوئے کیا ۔ انہوں نے کہاکہ ٹیلی ویژن ٹاک شوز ، ڈرامہ سیریلز میں آبادی کے مسئلے پر توجہ سود مند ثابت ہو سکتی ہے، آبادی کے مناسب انتظام کیلئے پارلیمانی ارکان کے فعال کردار ، پختہ سیاسی عزم کی ضرورت ہے ۔ انہوں نے کہاکہ عوامی آگاہی کیلئے آبادی میں اضافے پر پارلیمانی کاکس کی کارروائی کو مناسب طریقے سے اجاگر کیا جائے،میڈیا پبلک سروس پیغامات کے ذریعے ملک میں آبادی کی تشویشناک شرح کے بارے میں بیداری پیدا کرے ۔ انہوں نے کہاکہ خاندانی منصوبہ بندی اور بچوں کی پیدائش میں مناسب وقفہ رکھنے کی ضروت ہے ، اسلام زور دیتا ہے کہ مائیں اپنے بچوں کو دو سال تک اپنا دودھ پلائیں،بچوں کو دو سال تک ماں کا دودھ پلانے سے بچوں میں ذہنی و جسمانی کمزوری ، غذائیت کی کمی پر قابو پایا جا سکتا ہے۔وزیراعظم کے معاون خصوصی برائے صحت ڈاکٹر فیصل سطان نے کہا کہ آبادی میں بے ہنگم اضافہ قومی سلامتی کا مسئلہ بن سکتا ہے، آبادی میں اضافے سے نئی نسل کو تعلیم اور صحت کی سہولیات کی کمی کا سامنا کرنا پڑ سکتا ہے ۔رہنمائی کی کمی ، مانع حمل مصنوعات کی عدم دستیابی کی وجہ سے پاکستان میں 40 لاکھ ان چاہے حمل ہوتے ہیں ،پارلیمانی سیکرٹری برائے صحت ڈاکٹر نوشین حامد نے بریفنگ دیتے ہوئے آبادی کے انتظام سے متعلق پالیسی سازی پر پارلیمانی کاکس کے کردار پر روشنی ڈالی۔ نشست کے دوران صدر نے میڈیا کے ذریعے بڑے پیمانے پر آگاہی کے حوالے سے صحافیوں کے ساتھ تبادلہ خیال کیا۔