نشتر ٹو ہسپتال جلد فنکشنل کر دیا جائے گا، عوامی فلاح وبہبود کے منصوبوں کی خود مانیٹرنگ کر رہا ہوں:عثمان بزدار
لاہور(خواجہ عبدالرحمن سے ) وزیراعلیٰ پنجاب سردار عثمان بزدار نے صوبے میں جاری عوامی فلاح و بہبود کے ہیلتھ ڈویلپمنٹ پراجیکٹس کی بروقت تکمیل کی ہدایت کی ہے۔ وز یراعلیٰ عثمان بزدار نے متعلقہ حکام کو ہدایت کی کہ ڈیرہ غازی خان سمیت دیگر پسماندہ علاقوں کے ہیلتھ پراجیکٹس کی بروقت تکمیل یقینی بنائی جائے۔ عوام کی فلاح وبہبود کے ترقیاتی منصوبوں کی خود مانیٹرنگ کر رہا ہوں۔وزیراعلیٰ عثمان بزدار نے بتایا کہ ملتان میں نشتر ٹو ہسپتال بہت جلد عوام کیلئے کھول دیا جائے گا۔ ڈیرہ غازی خان میں 3 ارب 80 کروڑ سے سٹیٹ آف دی آرٹ مدر اینڈ چائلڈ ہسپتال بن رہا ہے۔ ٹیچنگ ہسپتال میں 3 ارب 84 کروڑ روپے کی لاگت سے ایمرجنسی اور او پی ڈی بنائی جا رہی ہے۔تحصیل ہیڈکوارٹر ہسپتال بارتھی کو 60 بیڈ تک اپ گریڈ کر دیا گیا ہے۔بارتھی ڈی ایچ کیو ہسپتال سے بلوچستان کے لوگ بھی مستفید ہوں گے۔تونسہ تحصیل ہیڈکوارٹر ہسپتال کو 190 بیڈ تک اپ گریڈ کر دیا گیا ہے۔کوہ سلیمان کے علاقے چاہ زنبو والا میں عوام کی سہولت کیلئے سیٹلائٹ فلٹر کلینک قائم ہوگا۔وزیراعلیٰ عثمان بزدار نے کہا کہ سردار فتح محمد بزدار انسٹی ٹیوٹ آف کارڈیالوجی سے 3 صوبوں کے عوام مستفید ہوں گے۔ 200 بیڈز پر مشتمل کارڈیالوجی انسٹی ٹیوٹ پر 2 ارب روپے لاگت آئے گی۔وزیراعلیٰ عثمان بزدار نے کہا کہ کارڈیالوجی انسٹی ٹیوٹ کا 100 بیڈز پر مشتمل پہلا فیز چند ماہ میں فنکشنل ہو جائے گا۔ ڈیرہ غازی خان کارڈیالوجی انسٹی ٹیوٹ فنکشنل ہونے سے ملتان اور لاہور کے ہسپتالوں پر پریشر کم ہوگا۔سندھ، بلوچستان اور کوہ سلیمان کے عوام کو دل کے امراض کا بہترین علاج گھر کے قریب میسر ہوگا۔