لینڈ سلائیڈنگ، ایبٹ آباد اور مری کو ملانے والی شاہراہ بند
مری (ثاقب ابراہیم غوری سے ) ایبٹ آباد سے مری کو ملانے والی مرکزی شاہراہ کنڈلہ میں لینڈ سلائیڈنگ کی وجہ سے بند ہو گئی۔
ترجمان گلیات ڈیولپمنٹ اتھارٹی (جی ڈی اے) احسن حمید کے مطابق گلیات میں سیاحوں کی کثیر تعداد موجود ہے اور سیاحوں سے گزارش ہے کہ وہ مزید سفر نہ کریں۔
انہوں نے کہا کہ گلیات میں موجود سیاح حفاطتی تدابیر اختیار کریں جبکہ سڑک کنارے غلط پارکنگ روڈ کلئیرنس میں بڑی وجہ ہے اور شدید برفباری کے باعث روڈ کو فوری طور پر صاف کرنا ممکن نہیں ہے۔
ترجمان جی ڈی اے نے کہا کہ سیاح توحید آباد اور ڈونگا گلی کے درمیان سفر سے اجتناب کریں۔
دوسری جانب مری میں تیز برف باری کا سلسلہ جاری ہے اور سیاحوں کی سہولت کے لیے ٹریفک پولیس کی اضافی نفری تعینات کر دی گئی ہے۔
ٹریفک پولیس کے مطابق صبح سے اب تک 17 ہزار کے قریب گاڑیاں مری میں داخل ہو چکی ہیں اور برفباری کے دوران پھسلن کے باعث ٹریفک آہستہ چل رہی ہے جبکہ ٹریفک اہلکار ہائی وے مشینری کے ساتھ برف ہٹانے میں مصروف ہیں۔
سی ٹی او راولپنڈی نے کہا ہے کہ سیاح مری آنے سے پہلے ٹریفک پولیس کی طرف سے دی گئی ہدایات پر عمل کریں۔ برفباری کے دوران سیاح ٹائر پر چین کا استعمال کریں جبکہ موسم کی شدت اور رش کو مد نظر رکھتے ہوئے مری کا سفر کریں۔
