یوم آزادی تجدید عہد کا دن ہے،سپرنٹنڈنٹ ڈسٹرکٹ جیل رحیم یارخان کامران حیدر
رحیم یارخان: سپرنٹنڈنٹ ڈسٹرکٹ جیل رحیم یارخان کامران حیدر نے کہا ہے کہ قائد اعظم محمد علی جناحؒ کی بے باک اور دور اندیشی نے مسلمانوں کے گلے میں موجود غلامی کے طوق سے نجات دلائی، یوم آزادی تجدید عہد کا دن ہے، معاشرے کے ہر طبقے کو پاکستان کے تحفظ اور ترقی میں اپنا کردار ادا کرنا چاہئے۔
یہ بھی پڑھیں: دوقومی نظریےکی بنیاد پرحاصل ہونےوالےوطن کی حفاظت سیکورٹی فورسز کے ساتھ ساتھ ہرفرد کی ذمہ داری، ڈاکٹرسائرہ بانو
میڈیا کے نمائندوں سے گفتگو کرتے ہوئے انہوں نے کہا کہ اگر قائد اعظم محمد علی جناحؒ مسلمانوں کے لئے الگ وطن کے قیام کی لازوال کوشش نہ کرتے تو آج پاکستان کے عوام آزاد فضاء میں سانس نہ لے رہے ہوتے، پاکستان کے ہر شہری کو اباؤ اجداد کی قربانیوں سے حاصل ہونے والی آزاد ریاست کی قدر کرنی چاہئے اور وطن عزیز کی ترقی و استحکام کے لئے اپنا بھر پور کردار ادا کرنا چاہئے۔
کامران حیدر نے کہا کہ پاک فوج سمیت قانون نافذ کرنے والے ادارے جس طرح پاکستان کو دشمنوں سے محفوظ بنانے کے لئے اپنا کردار ادا کررہے ہیں اس کی مثال نہیں ملتی، وطن عزیز کے ہر باسی کو پاکستان کی حفاظت کرنے والے سیکورٹی اداروں کے شانہ بشانہ کھڑا ہونا چاہئے تاکہ لاکھوں انسانی جانوں کی قربانیوں سے حاصل ہونے والے اس خطے کو دشمن طاقتوں سے حفاظت یقینی بنائی جا سکے۔
یہ بھی پڑھیں: مشاہیر پاکستان کی عملی جدوجہد سے تحریک پاکستان کامیابی سے ہمکنار ہوئی،ڈائریکٹربھاولپورمیوزیم محمد زیبرربانی
کامران حیدر نے کہا کہ پاکستان کا نوجوان طبقہ اعلیٰ تعلیم، ہنر حاصل کرکے اور دور جدید کے تقاضوں سے ہم آہنگ ہو کر پاکستان کا نام دنیا میں روشن کرنے کے لئے بھر پور محنت کرے تاکہ وطن عزیز کو حقیقی معنوں میں قائد اعظم ؒ کا کامیاب پاکستان بنایا جا سکے۔ انہوں نے کہا کہ ڈسٹرکٹ جیل میں بند قیدیوں کو اپنے وطن سے محبت، اس کی ترقی میں کردار ادا کرنے اور جرائم سے توبہ کرنے کے حوالے سے بھر پورمثبت ذہن سازی کی جا رہی ہے۔