پاکستان نے بنگلہ دیش کو ڈھاکہ ٹیسٹ میں اننگز اور 8 رنز سے ہرا کر سیریز جیت لی، فالو آن کا شکار بنگلہ دیشی ٹیم دوسری اننگز میں بھی 205 رنز بنا کر آئوٹ، ساجد خان کو میچ میں 12 وکٹیں لینے پر مرد میدان قرار دیا گیا
ڈھاکہ۔ (علی رضا غوری سے ):پاکستان نے ساجد خان کی تباہ کن بائولنگ کی بدولت بنگلہ دیش کو ڈھاکہ ٹیسٹ میں اننگز اور 8 رنز سے شکست دے کر دو میچوں کی سیریز میں کلین سویپ کر دیا۔
بارش سے متاثرہ ٹیسٹ کے پانچویں اور آخری روز فالو آن کا شکار بنگلہ دیشی ٹیم دوسری اننگز میں بھی پاکستان کی مضبوط بائولنگ کے سامنے بے بس نظر آئی اور پوری ٹیم 205 رنز بنا کر آئوٹ ہوگئی۔ شکیب الحسن 63 رنز کے ساتھ ٹاپ سکورر رہے۔ ساجد خان نے دوسری اننگز میں بھی شاندار بائولنگ کی اور 4 کھلاڑیوں کو آئوٹ کیا، انہیں میچ میں مجموعی طور پر 12 وکٹیں حاصل کرنے پر مرد میدان قرار دیا گیا۔
عابد علی سیریز کے بہترین پلیئر قرار پائے۔ بدھ کو شیر بنگلہ نیشنل سٹیڈیم، میر پور میں بنگلہ دیش نے اپنی پہلی نامکمل اننگز 76 رنز 7 کھلاڑی آئوٹ پر دوبارہ شروع کی تو بقیہ کھلاڑی گزشتہ روز کے سکور میں محض 11 رنز کا اضافہ کرنے کے بعد پویلین واپس لوٹ گئے، اس طرح میزبان ٹیم 86 رنز پر ڈھیر ہو گئی اور اسے فالو آن کی خفت کا سامنا کرنا پڑا۔
شکیب الحسن 33 رنز کے ساتھ ٹاپ سکورر رہے۔ پاکستان کی طرف سے ساجد خان نے تباہ کن بائولنگ اور 42 رنز کے عوض 8 کھلاڑیوں کو آئوٹ کیا۔ فالو آن کا شکار بنگلہ دیشی ٹیم دوسری اننگز میں بھی پاکستان کی مضبوط بائولنگ کے سامنے ریت کی دیوار ثابت ہوئی اور پوری ٹیم 205 رنز بنا کر آئوٹ ہو گئی۔ شکیب الحسن، مشفق الرحیم اور لٹن داس کے علاوہ کوئی بھی بنگلہ دیشی بلے باز پاکستانی بائولرز کو جم کر نہ کھیل سکا، شکیب الحسن نے 63 رنز کی عمدہ اننگز کھیلی۔
مشفق الرحیم بدقسمت رہے اور 48 کے انفرادی سکور پر رن آئوٹ ہو گئے جبکہ لٹن داس نے 45 رنز کی مزاحمتی اننگز کھیلی۔ شادمان اسلام 2، محمود الحسن 6، کپتان مومن الحق 7، نجم الحسن شانتو 6، مہدی حسن میراز 14، تیج الاسلام 5 اور خالد احمد بغیر کوئی رن بنائے آئوٹ ہو گئے۔
ساجد خان نے عمدہ بائولنگ کا مظاہرہ کیا اور 4 وکٹیں حاصل کیں۔ شاہین شاہ آفریدی اور حسن علی نے دو، دو کھلاڑیوں کو آئوٹ کیا۔ ساجد خان کو میچ میں مجموعی طور پر 12 وکٹیں حاصل کرنے پر میچ کا بہترین کھلاڑی قرار دیا گیا۔ عابد علی کو سیریز کا بہترین پلیئر قرار دیا گیا۔ واضح رہے کہ اس سے قبل پاکستان نے تین ٹی 20 میچوں کی سیریز میں بھی بنگلہ دیش کو کلین سویپ شکست دی تھی۔
