بھارت کی ممبئی ٹیسٹ میں پوزیشن مستحکم،نیوزی لینڈپہلی اننگز میں 62رنز پرڈھیر،میزبان ٹیم کومجموعی طور پر 332رنز کی برتری حاصل،کیوی سپنراعجازپٹیل کی تاریخ ساز بائولنگ،10کھلاڑیوں کو نشانہ عبرت بنایا
ممبئی۔ (علی رضا غوری سے ):نیوزی لینڈ کی ٹیم ممبئی ٹیسٹ کے دوسرے روز اپنی پہلی اننگز میں 62 رنز بناکر آئوٹ ہو گئی اور اسے 263 رنز خسارے کا سامنا کرنا پڑا۔ نیوزی لینڈ کے 9 کھلاڑی دوہرا ہندسہ بھی عبور نہ کر سکے۔
کائل جمیسن 17 اور کپتان ٹام لیتھم 10 رنز بناکر نمایاں رہے۔ ول ینگ 4 ، ڈیرل مچل 8 ، روس ٹیلر ایک، ہینری نکولس 7 ، ٹام بلنڈل 8، ریچن روندرا 4 جبکہ ٹم سائودی اور ولیم سمرولی بغیر کوئی رن بنائے پویلین واپس لوٹ گئے۔ اس سے قبل بھارت کی ٹیم اپنی پہلی اننگز میں 325 رنز بناکر آئوٹ ہو گئی تھی۔
میانک اگروال نے 150 رنز کی دلکش اننگز کھیلی۔ اگزر پٹیل 52 رنز کے ساتھ دوسرے نمایاں بلے باز رہے۔ نیوزی لینڈ کے لیفٹ آرم سپنر اعجاز پٹیل نے 119 رنز کے عوض بھارت کی پوری ٹیم آئوٹ کرکے تاریخ رقم کردی۔ بھارت نے دوسرے روز کھیل کے اختتام پر اپنی دوسری اننگز میں بغیر کسی نقصان کے 69 رنز بنا لئے اور اسے 332 رنز کی برتری حاصل ہو گئی ہے۔ میانک اگروال 38 اور چیتشوار پجارا 29 رنز کے ساتھ وکٹ پر موجود ہیں۔
