پاکستان اور بنگلہ دیش کے درمیان دوسرا ٹیسٹ ہفتہ کو ڈھاکہ میں شروع ہوگا
ڈھاکہ۔ (علی رضا غوری ):پاکستان اور بنگلہ دیش کی کرکٹ ٹیموں کے درمیان دوسرا اور آخری ٹیسٹ کل ہفتہ سے 8 دسمبر تک شیر بنگلہ نیشنل سٹیڈیم ، ڈھاکہ میں کھیلا جائے گا۔
پاکستان کو دو میچوں کی سیریز میں 0-1 کی برتری حاصل ہے۔ چٹوگرام میں کھیلے گئے پہلے ٹیسٹ میچ میں پاکستان نے بنگلہ دیش کو بآسانی 8 وکٹوں سے شکست دی تھی۔ مایہ ناز بلے باز بابر اعظم قومی ٹیم کو لیڈ کر رہے ہیں۔
واضح رہے کہ اس سے قبل قومی ٹیم بنگلہ دیش کے خلاف تین ٹی 20 میچوں کی سیریز میں کلین سویپ کر چکی ہے۔ بنگلہ دیش ٹیم کے لئے پلس پوائنٹ ہے کہ شکیب الحسن فٹنس مسائل سے چھٹکارا پانے کے بعد دوسرے ٹیسٹ کے لئے دستیاب ہوں گے۔ شکیب الحسن نے گزشتہ روز ڈھاکہ میں فٹنس ٹیسٹ پاس کیا تھا۔
پاکستان کے خلاف دوسرے ٹیسٹ میچ کے لئے بنگلہ دیشی سکواڈ کی کمان مومن الحق سنبھالیں گے۔ بنگلہ دیشی ٹیم کے کپتان کا کہنا ہے کہ دوسرا ٹیسٹ جیت کر سیریز کا اختتام برابری پر کرنا چاہتے ہیں جبکہ پاکستان ٹیم کے کپتان بابر اعظم نے کہا ہے کہ میزبان ٹیم کو دوسرے میچ میں بھی شکست دے کر سیریز کلین سویپ کریں گے۔
بنگلہ دیش کو سیریز برابر کرنے کے لئے میچ جیتنا ضروری ہوگا۔ اس اعتبار توقع کی جارہی ہے کہ سیریز کا دوسرا میچ کانٹے دار ہوگا
