پاکستان نے سستا تیل اور گیس خریدنے کیلئے روس سے باضابطہ رابطہ کرلیا
پاکستان نے سستا تیل اور گیس خریدنے کیلئے روس سے باضابطہ رابطہ کرلیا۔ دنیا نیوز نے ذرائع کا حوالہ دیتے ہوئے رپورٹ کیا کہ سستا تیل اور گیس خریدنے کیلئے پاکستان کا روس سے باضابطہ رابطہ ہوگیا ہے، اس مقصد کے لیے روس کے ساتھ وزارت خارجہ اور وزارت پٹرولیم کی سطح پر خط و کتابت کا آغاز ہوچکا ہے، جس میں پاکستان نے روس سے کہا ہے کہ تیل اور گیس کی خریداری میں دلچسپی رکھتے ہیں تاہم خریداری کی شرط ہے کہ اس کی وجہ سے ہم پر پابندیاں نہ لگیں
رپورٹ میں ذرائع کے حوالے سے مزید معلوم ہوا ہے کہ پاکستان تیل اور گیس کی خریداری میں کسی گلوبل ٹریٹی کی خلاف ورزی نہیں کرے گا، روس سے تیل اور گیس کی خریداری قومی مفاد میں کی جائے گی، اس لیے روس کی جانب سے باضابطہ دعوت ملنے پر پاکستان کا وفد روس کا دورہ کرنے کیلئے تیار ہے
ادھر عالمی منڈی میں خام تیل کی قیمت 5 فیصد کم ہوگئی۔ دوران ٹریڈنگ برینٹ خام تیل 86 ڈالر فی بیرل پر آگیا جبکہ ڈبلیو ٹی آئی خام تیل 77 ڈالر فی بیرل پر ٹریڈ ہو رہا ہے، اس کے علاوہ عالمی گیس کی قیمت 4 فیصد کمی سے 6 ڈالر 8 سینٹس فی ایم ایم بی ٹی یو ریکارڈ ہوئی۔
واضح رہے کہ آج سے تین روز قبل وفاقی وزیر خزانہ اسحاق ڈار نے اعلان کیا تھا کہ 16 نومبر سے ملک میں پیٹرولیم مصنوعات کی قیمتوں میں کوئی اضافہ نہیں کیا جائے گا، اسحاق ڈار نے کہا کہ آئندہ 15 روز کیلئے پیٹرولیم مصنوعات کی موجودہ قیمتیں ہی برقرار رہیں گی، پیٹرول کی قیمت 224 روپے 80پیسے، ڈیزل کی فی لیٹر قیمت 235 روپے 30 پیسے برقرار رہے گی، اس کے علاوہ مٹی کے تیل کی قیمت 191 روپے 83 پیسے فی لیٹر اور لائٹ ڈیزل آئل کی قیمت 186 روپے 50 پیسے برقرار رہے گی
