پاکستان اور بنگلہ دیش کے درمیان دوسرا ٹیسٹ 4 دسمبر سے شروع ہو گا، بنگلہ دیشی سکواڈ کا اعلان، شکیب الحسن کی واپسی
ڈھاکہ۔ (عاقب ابراہیم غوری سے ):پاکستان اور بنگلہ دیش کی کرکٹ ٹیموں کے درمیان دوسرا اور آخری ٹیسٹ 4 سے 8 دسمبر تک شیر بنگلہ نیشنل سٹیڈیم میرپور میں کھیلا جائے گا۔
پاکستان کو دو میچوں کی سیریز میں 0-1 کی برتری حاصل ہے۔ چٹوگرام میں کھیلے گئے پہلے ٹیسٹ میچ میں پاکستان نے بنگلہ دیش کو بآسانی 8 وکٹوں سے شکست دی تھی۔
مایہ ناز بلے باز بابر اعظم قومی ٹیم کو لیڈ کر رہے ہیں۔ واضح رہے کہ اس سے قبل قومی ٹیم بنگلہ دیش کے خلاف تین ٹی 20 میچوں کی سیریز میں کلین سویپ کر چکی ہے۔ بنگلہ دیش کرکٹ بورڈ نے پاکستان کے خلاف دوسرے ٹیسٹ میچ کے لئے سکواڈ کا اعلان کر دیا ہے۔
شکیب الحسن فٹنس مسائل سے چھٹکارا پانے کے بعد دوسرے ٹیسٹ کے لئے دستیاب ہوں گے۔ شکیب الحسن نے گزشتہ روز ڈھاکہ میں فٹنس ٹیسٹ پاس کیا۔ فاسٹ بائولر تسکین احمد نے بھی ٹیم میں واپسی کی ہے ، وہ پاکستان کے خلاف تیسرے ٹی ٹونٹی میچ کے دوران انگلی میں چوٹ کے باعث ان فٹ ہوگئے تھے جبکہ ٹی ٹونٹی کھلاڑی محمد نائم کو پہلی مرتبہ ٹیسٹ سکواڈ میں شامل کیا گیا ہے۔
پاکستان کے خلاف دوسرے ٹیسٹ میچ کے لئے بنگلہ دیشی سکواڈ میں کپتان مومن الحق ، شادمان اسلام، سیف حسن، ناظم الحسین شانتو، مشفیق الرحیم، شکیب الحسن، لٹن داس، یاسر علی، نور الحسن، مہدی حسن ، تیجل اسلام، تسکین احمد، عبادت حسین، ابو جاوید، نعیم حسن، محمد حسن جوے، رجائوالرحمان راجہ، خالد احمد، شوہید الاسلام اور محمد نائم شامل ہیں