عطا تارڑ نے 25 کروڑ روپے کی پیش کش کی، لیگی رہنما کی کال ریکارڈ کر لی
لاہور (یاسر ملک سے ) عطا تارڑ نے 25 کروڑ روپے کی پیش کش کی، لیگی رہنما کی کال ریکارڈ کر لی، تحریک انصاف کے 3 ایم پی ایز کا کروڑوں روپے کی پیش کش ہونے کا دعویٰ، بیان حلفی جمع کروا دیے۔ دوسری جانب پاکستان تحریک انصاف کے چیئرمین عمران خان نے ایم پی ایز کی ہارس ٹریڈنگ پر اپنے ردعمل میں کہا کہ جو کچھ اسلام آباد میں ہوا اس کا نظارہ آج لاہور کررہا ہے جہاں ایم پی ایز کو خریدنے کیلئے 50 کروڑ روپے تک کی پیشکش کی جا رہی ہے۔
اس سب کے پیچھے مرکزی کردار زرداری ہے جو اپنی کرپشن پر این آراو لیتا ہے اور چوری کے اس پیسے سے لوگوں کو خریدتا ہے۔ اسے جیل میں پھینکا جانا چاہئیے۔ یہ ہماری جمہوریت پر ہی نہیں بلکہ ہمارے سماج کی اخلاقی بنیادوں پر بھی سنگین حملہ ہے۔
عدالتِ عظمیٰ نے کارروائی کی ہوتی اور ان لوٹوں کو تاحیات نااہل کیا ہوتا تو اس سلسلے کی روک تھام کا کچھ بندوبست ممکن ہوتا۔
کیا تبدیلی سرکار کی امریکی سازش سے آنے والی امپورٹڈ حکومت کے سرپرستوں کو قوم کے اس سنگین نقصان کا کچھ بھی احساس نہیں؟ مزید برآں پاکستان تحریک انصاف کے ترجمان فواد چودھری نے پریس کانفرنس کرتے ہوئے کہا کہ عوام نے فیصلہ دے دیا کہ تخت لاہور پر تحریک انصاف کا حق ہے، پی ٹی آئی کے پاس 188ممبران ہیں، راولپنڈی کی نشست پر آراو کا فیصلہ کالعدم قرار دیا اور دوبارہ گنتی کا حکم دیا ہے، اسی طرح مظفر گڑھ میں بھی گنتی کرائی جارہی ہے، ہماری نشستیں 190تک ہوجائیں گی۔
پنجاب میں ایک شیطانی کھیل شروع کیا گیا ہے، وزیرداخلہ رانا ثناء اللہ ٹی وی پر آکر کہتا ہے کہ پانچ لوگ ادھر سے ادھر ہوسکتے ہیں، کوئی مسئلہ نہیں ہے، اسی طرح باقی وزیربھی بات کرتے ہیں، اگر معاملہ بیانات تک رہتا تو کوئی حرج نہیں تھی،مبینہ طور پر ہمارے رحیم یار خان سے ایم پی اے مسعود مجید40کروڑ لے کر ترکی پہنچ گئے ہیں، اس کا ماسٹرمائنڈ آصف زرداری ہے، سپریم کورٹ نے رانا ثناء اللہ کے بیان کا ٹرانسکرپٹ منگوایا ہے، اب سپریم کورٹ میں غضنفر چینہ، سردار شہاب الدین اور عامر ہے ان تینوں نے سپریم کورٹ میں بیان حلفی جمع کرائے کہ ان کو پیسوں کی آفر کی گئی، عطا تارڑ نے کہا آپ ہماری مدد کریں ، 14لوگوں کیلئے 14ارب چاہیے جس پر عطا تارڑ نے کہا کہ ہم 25کروڑ تک دے سکتے ہیں۔
آصف زرداری نے ہماری اخلاقی اقدار کا بیڑہ غرق کردیا ہے، مسعود مجید کو 40کروڑ روپے دے کر ترکی پہنچا دیا گیا ہے، زرداری صاحب سندھ حکومت کا پیسا دے رہے ہیں، الیکشن کمیشن سے خیر کی کوئی امید نہیں ہے، الیکشن کمیشن نے پلاننگ کے تحت خریدوفرخت کررہا ہے، اگر الیکشن کمیشن نے سپریم کورٹ کے سینیٹ انتخابات سے متعلق فیصلے کے تحت ہارس ٹریڈنگ کو روکا ہوتا تو آج یہ سب نہ ہوتا، اگر اس ہارس ٹریڈنگ کو نہ روکا گیا تو جمہوریت کا کوئی مستقبل نہیں ہے۔
ایک ایک ایم پی اے کو 35، 35کروڑ کی آفر ہورہی ہے، کہ آپ پیسے لے کر باہر چلے جائیں، ہم ارکان کے بیان حلفی سپریم کورٹ میں جمع کرائیں گے اور مطالبہ ہے کہ سپریم کورٹ انتخابی قانون کے تحت آصف زرداری ، رانا ثناء اللہ اور عطاتارڑ کو فوری گرفتار کیا جائے۔آصف زرداری ان سب کا سرغنہ ہے، سپریم کورٹ سے مطالبہ کرتے ہیں کہ اس سارے معاملے کی تحقیقات کی جائیں۔وزیراعلیٰ پنجاب کے الیکشن میں قانونی تقاضے پورے کیے جائیں۔