سندھ میں بلدیاتی انتخابات کے ساتھ این اے 245 کا ضمنی الیکشن بھی ملتوی
اسلام آباد(:قاری عاشق حسین سے )کراچی سمیت سندھ میں ہونے والے بلدیاتی انتخابات کے دوسرے مرحلے کے ساتھ قومی اسمبلی کے حلقہ این اے 245 پر ہونے والے ضمنی انتخاب کو بھی ملتوی کردیا گیا ہے۔
فیصلہ الیکشن کمیشن آف پاکستان کی جانب سے کیا گیا ہے۔ اس حوالے سے ترجمان الیکشن کمیشن کا کہنا ہے کہ کراچی کے حلقہ این اے 245 کا ضمنی الیکشن بھی ملتوی کردیا گیا ہے۔ این اے 245 کراچی میں ضمنی الیکشن 27 جولائی کو شیڈول تھا۔
ترجمان الیکشن کمیشن کے مطابق کراچی سمیت سندھ میں بلدیاتی انتخابات کا دوسرا مرحلہ اب 28 اگست 2022 کو ہوگا جب کہ این اے 245 کراچی کا ضمنی الیکشن اب 21 اگست 2022 کو شیڈول کیا گیا ہے۔
ترجمان الیکشن کمیشن کا کہنا ہے کہ فیصلہ صوبائی الیکشن کمشنر ،عوام کی درخواستوں اور محکمہ موسمیات کی رپورٹ پر کیا گیا ہے۔ واضح رہے کہ کراچی کے حلقہ این اے 245 کی نشست پی ٹی آئی کے ایم این اے عامر لیاقت کی وجہ سے خالی ہوئی ہے۔