6 دن بعد مکمل تیاری کےساتھ نکلیں گے، عمران خان
عمران خان نے کہا ہے کہ 6 دن بعد مکمل تیاری کےساتھ نکلیں گے۔
چیئرمین پاکستان تحریک انصاف عمران خان نے پریس کانفرنس کرتے ہوئے کہا ہے کہ لانگ مارچ کے وقت ہمارے لوگ جاں بحق ہوئے، پی ٹی آئی کے شہداء کے لیے پارٹی ایک ایک کروڑ روپے اکھٹا کرے گی۔
انہوں نے کہا کہ ہمارے ساتھیوں پر تشدد کیا گیا، ملک کی توہین ہے 30سال سے پاکستان کو کھانے والے حکمران ہیں، یہ حکومت سازش کے تحت آئی، ضمانت پر رہا شخص وزیراعظم ہیں۔
عمران خان نے کہا کہ فیصل عباس کو راوی پل سے پھینکا گیا، وکلا کو پولیس نے گاڑیوں سے نکال کر تشدد کیا، چن چن کر ہمار ے لوگوں پر تشدد کیا گیا، عمر ایوب کو بےدردی سے مارا گیا۔
چیئرمین پاکستان تحریک انصاف نے کہا کہ کون سی پولیس اس طرح بیٹیوں،بچوں اور رہنماؤں کو مارتی ہے، پروپیگنڈا کیا گیا کہ ہم انتشار پھیلانے آرہے ہیں، لاہور لبرٹی چوک پر خواتین پر شیلنگ کی گئی۔
انہوں نے کہا کہ شہبازشریف اور راناثناءاللہ کو ماڈل ٹاؤن واقعے میں سزا ہوتی تو آج یہ نہ ہوتا، کارکن اور رہنما مایوس تھے کہ ہم وہاں جاکر کیوں واپس آئے، مجھے اسی رات خون خرابے کا خدشہ تھا، لوگ غصے میں تھے۔
عمران خان نے کہا کہ میں اگر اسی رات جاکر بیٹھ جاتا تو خون خرابہ یقینی تھا۔