گورنمنٹ صادق کالج ویمن یونیورسٹی بہاولپور میں یونیورسٹی لائبریری کی جانب سے دو روزہ سالانہ بک فیئر 2021 کا انعقاد
بہاول پور( زوہیب بھٹی سے)دی گورنمنٹ صادق کالج ویمن یونیورسٹی بہاولپور میں یونیورسٹی لائبریری کی جانب سے دو روزہ سالانہ بک فیئر 2021 کا انعقاد کیا گیا جس کی مہمان خصوصی وائس چانسلر پروفیسر ڈاکٹر صاعقہ امتیاز آصف تھیں۔ انہوں نے نے ربن کاٹ کر دو روزہ بک فیئر کا باقاعدہ افتتاح کیا۔وائس پروفیسر ڈاکٹر صاعقہ امتیاز آصف نے اساتذہ کے ہمراہ کتابوں کے اسٹالز کا دورہ کیا اور ایسی ادبی سرگرمیوں کے انعقاد کو طلبا کے ذہنی ارتقا کے لئے کلیدی قرار دیتے ہوئے مستقبل میں ایسی ادبی سرگرمیاں جاری رکھنے کا عندیہ دیتے ہوئے کہا کہ کتاب سے بڑھ کر دنیا میں کوئی ایسی شے نہیں جو ہمیشہ آپ کی دوست رہے۔ کتب کے مطالعہ سے انسان اپنے اخلاق اور معیار زندگی کو بلند کرسکتا ہے،ترقی کرنا ہر دور کا تقاضا رہا ہے نئی نسل کو بھی نئے دور کے تقاضوں کے ساتھ ہم آہنگ ہو کر چلنا چاہئے لیکن کتب بینی جیسی خوبصورت عادت کو فراموش نہیں کرنا چاہئے۔ان کا مزید کہنا تھا کہ وہ دن بھر کی مصروفیت کے باوجود ذہنی سکون کے لیے کتابوں کا مطالعہ کرتی ہیں۔ اس موقع پر وائس چانسلر پروفیسر ڈاکٹر صاعقہ امتیاز آصف نے بک فیئر 2021 کا کیک بھی کاٹا اور یونیورسٹی لائبریری کے اسٹاف کی بہترین کاوشوں پر مبارکباد پیش کی۔ دو روزہ بک فیئر میں یونیورسٹی اساتذہ اور طالبات کی کثیر تعداد نے شرکت کی اور اس طرح کی سرگرمیوں کو مستقبل میں بھرپور طریقہ سے منانے کا عزم کیا۔
