اسلامیہ یونیورسٹی میں نواب آف بہاولپور سر صادق محمد خان عباس پنجم کی حیات و خدمات پر مبنی کتاب کی تقریب رونمائی

بہاول پور: (یاسر ملک سے)اسلامیہ یونیورسٹی بہاول پور میں قائم سرصادق عباسی چیئر کے زیر اہتمام شائع کی جانے والی پہلی کتاب”سرصادق محمد خان عباسی پنجم حیات و خدمات“ کی تقریب رونمائی وائس چانسلرسیکرٹریٹ کانفرنس روم، عباسیہ کیمپس میں منعقد کی گئی۔ تقریب کی صدارت وائس چانسلر انجینئر پروفیسر ڈاکٹر اطہر محبوب نے کی جبکہ عباسی خاندان کے بزرگ صاحبزادہ رحیم یارخان عباسی مہمان خصوصی تھے۔ تقریب میں شہر بھر سے علمی، ادبی اور سماجی شخصیات نے شرکت کی۔ کتاب کے حوالے سے مختلف لوگوں نے اپنے مضامین پیش کیے۔ سابق صدر پریس کلب نصیر احمد ناصر نے اظہار خیال کرتے ہوئے کہا کہ سرصادق چیئر اور وائس چانسلر انجینئرپروفیسر ڈاکٹر اطہر محبوب اس شاندار کام پر خراج تحسین کے مستحق ہیں۔ انہوں نے کہا کہ نواب سر صادق محمد خان عباسی پنجم کی حیات و خدمات کے حوالے سے مختلف دیگر تعلیمی اداروں میں بھی کام ہو نا چاہیے اور سر صادق چیئر اس حوالے سے بہترین کام کر سکتی ہے۔ سماجی رہنما رضیہ فاروق خان نے کہا کہ نواب آف بہاول پور کے نہ صرف اس ریاست کے عوام بلکہ پاکستان پر عظیم احسانات ہیں۔ سر صادق محمد خان عباسی پنجم کی خدمات کو لوگوں تک پہنچانے کا جو کام اسلامیہ یونیورسٹی بہاول پور کی سرصادق چیئر نے شروع کیا ہے وہ قابل تحسین ہے۔ مضامین پیش کرنے والے دیگر مقررین نے کہا کہ نوا ب سر صادق محمدخان عباسی کے قائد اعظم محمد علی جناح سے دیرینہ تعلقات تھے۔ نواب آف بہاول پور نے اپنی خوشحال ریاست کا الحاق پاکستان سے کر کے سچا مسلمان ہونے کا ثبوت دیا۔ نواب سر صادق محمدخان عباسی پنجم نے نہ صرف بہاول پور میں کئی تعلیمی اداروں کی بنیاد رکھی بلکہ پاکستان کے دیگر شہروں میں بھی تعلیمی اداروں کے قیام میں مالی معاونت کی۔ سابق چیئر مین شعبہ اردو اسلامیہ یونیورسٹی بہاول پور پروفیسر ڈاکٹر مشتاق احمد نے کہا کہ سر صادق محمد خان عباسی کو ہندوستان کی جانب سے دھمکیاں دی گئیں کہ اگر انہوں نے اپنی ریاست کا الحاق پاکستان کے ساتھ کیا تو وہ ریاست کاپانی بند کر دیں گے لیکن نواب آف بہاول پور نے کسی دباؤ میں آئے بغیر ریاست کا الحاق پاکستان کے ساتھ کیا۔ سر صادق چیئرکے زیر اہتمام شائع ہونے والی کتاب  ”سر صادق محمد خان عباسی پنجم حیات و خدمات“ کے مرتب کردہ سابق چیئرمین شعبہ تاریخ پروفیسر ڈاکٹر شاہد حسن رضوی نے خطاب کرتے ہوئے کہا کہ یونیورسٹی میں سر صادق چیئر کا قیام وائس چانسلر انجینئر پروفیسر ڈاکٹر اطہر محبوب کی اسلاف دوستی اور علمی و تاریخی تدبر کا عملی ثبوت ہے۔ کتاب میں 18مضامین شامل کیے گئے ہیں جنہیں ایم فل، پی ایچ ڈی سکالرز اور بہاول پور کی تاریخ پر گہری نظر رکھنے والے ماہرین کی جانب سے لکھا گیا ہے۔ یہ کتاب سر صادق محمد خان عباسی کی خدمات کو عوام تک پہنچانے کی پہلی کڑی ہے۔ سرصادق چیئر مستقبل میں سر صادق محمد خان عباسی پنجم کی حیات و خدمات پر ایک ڈاکیومنٹری بنانے جا رہی ہے۔ تقریب کے مہمان خصوصی صاحبزادہ رحیم یار خان عباسی نے وائس چانسلر پروفیسر ڈاکٹر اطہر محبوب کی کاوشوں کو سراہا۔ انہوں نے کہاکہ یونیورسٹی کی جانب سے ایسے اقدامات سے نہ صرف بہاول پور کے عوام بلکہ ملک بھر کے لوگ محسن پاکستان نوا ب سر صادق محمدخان عباسی پنجم کے عظیم کارناموں سے آشنا ہو ں گے۔ صدر محفل وائس چانسلر انجینئر پروفیسر ڈاکٹر اطہر محبوب نے خطاب کرتے ہوئے کہا کہ تقریباً 100سال قبل نوا ب آف بہاول پور نے جامعہ اسلامیہ کے نام سے جو پودا لگایا تھا آج وہ تناور درخت بن چکا ہے۔ آج اس ادارے میں مزید 55ہزار سے زائد طلباء وطالبات داخلہ لینے کے خواہش مند ہیں جن میں سے  20ہزار کے قریب طلباء کا تعلق ملتان اور ڈیرہ غازی خان ڈویژن سے ہے۔انہوں نے مزید کہا کہ آج اسلامیہ یونیورسٹی بہاول پور نوا ب سر صادق محمد خان عباسی پنجم کے ویژن کو لے کر ترقی کی منازل طے کر رہی ہے۔ ہم چاہیں گے کہ مختلف شعبہ جات کے پیپرز میں نواب آف بہاول پور کے حوالے سے سوالات شامل کیے جائیں تاکہ طلباء ان کی حیات و خدمات سے روشنا س ہو سکیں۔ کتاب کی اشاعت پر وائس چانسلر انجینئر پروفیسر ڈاکٹر اطہر محبوب نے صاحب کتا ب ڈاکٹر شاہد حسن رضوی اور سر صادق چیئر کو مبارکباد دی۔تقریب کے آخر میں نامور سماجی شخصیت فاروق احمد خان کی جانب سے وائس چانسلر انجینئر پروفیسر ڈاکٹر اطہر محبوب، ڈاکٹر شاہد حسن رضوی اور مہمان خصوصی صاحبزادہ رحیم یار خان عباسی کو اجرک اور پھولوں کے تحفے پیش کیے گئے۔ تقریب کی نظامت کے فرائض چیئر میں شعبہ اردو اقبالیات ڈاکٹررفیق الاسلام نے ادا کیے۔