ایران کے وزیر خارجہ جناب حسین امیر عبداللہیان کا وزیر خارجہ مخدوم شاہ محمود قریشی کے ساتھ ٹیلیفونک رابطہ

دونوں وزرائے خارجہ کے مابین علاقائی بالخصوص افغانستان کی ابھرتی ہوئی صورتحال سمیت باہمی دلچسپی کے امور پر تبادلہ خیال ہوا

ایرانی وزیر خارجہ نے وزیر خارجہ مخدوم شاہ محمود قریشی کو، اگلے ہفتے تہران میں متوقع، افغانستان کے قریبی ہمسایہ ممالک کے وزارتی سطح کے دوسرے اجلاس میں شرکت کی دعوت دی

وزیر خارجہ نے” علاقائی سطح پر مشترکہ لائحہ عمل اپنانے کے حوالے سے پاکستان کے اقدام کی مکمل تائید اور حمایت پر ایرانی وزیر خارجہ کا شکریہ ادا کرتے ہوئے، اس اہم اجلاس کے بروقت انعقاد پر ایرانی وزیر خارجہ کو مبارکباد دی

وزیر خارجہ مخدوم شاہ محمود قریشی نے توقع ظاہر کی کہ افغانستان کے قریبی ہمسایہ ممالک کے اجلاس کے انعقاد اور باہمی گفت و شنید سے علاقائی سطح پر تعاون کو مستحکم بنانے میں مدد ملے گی

افغانستان کے حوالے سے ہمارے نقطہ نظر میں مماثلت اور ہم آہنگی خوش آئند ہے، مخدوم شاہ محمود قریشی

افغانستان میں قیام امن کیلئے علاقائی سطح پر تعاون ناگزیر ہے، مخدوم شاہ محمود قریشی

افغانستان میں پنپنے والے معاشی بحران سے نمٹنے کیلئے مشترکہ کاوشیں بروئے کار لانے کی ضرورت ہے، مخدوم شاہ محمود قریشی

واضح رہے کہ افغانستان کے قریبی ہمسایہ ممالک کا اولین اجلاس، 8 ستمبر 2021 کو، پاکستان کی دعوت پر بذریعہ ویڈیو لنک منعقد ہوا – جس میں پاکستان،چین،ایران ،تاجکستان ،ترکمانستان اور ازبکستان کے وزرائے خارجہ نے شرکت کی اور اجلاس کے بعد ایک متفقہ اعلامیہ بھی جاری کیا گیا