2047میں پاکستان کی آبادی کتنی ہو گی،سن کراراکین اسمبلی سر پکڑ کر بیٹھ گئے
لاہور (یاسر ملک سے ) 2047میں پنجاب کی آبادی 25 کروڑ، پاکستان کی 50 کروڑ تک پہنچ جائے گی، آبادی میں تیزی سے اضافہ ٹائم بم،اس تناظر میں ایمرجنسی بنیادوں پر کام کرنے کی ضرورت ہے، پنجاب کے اراکین اسمبلی کا بڑھتی ہوئی آبادی کیلئے فوری پالیسی بنانے کا مطالبہ۔ تفصیلات کے مطابق پنجاب اسمبلی کے حالیہ اجلاس میں اراکین صوبائی اسمبلی نے آبادی میں اضافے جیسے سنگین مسئلے پر تفصیلی بحث کی۔
پنجاب اسمبلی کے اجلاس میں صوبائی وزیر بہبود آبادی ہاشم ڈوگر نے بڑھتی ہوئی آبادی کیلئے فوری پالیسی بنانے کا مطالبہ کرتے ہوئے کہا ہے کہ 2047میں پنجاب کی آبادی 25کروڑ اور پاکستان کی آبادی 50کروڑ تک پہنچ جائے گی۔ بڑھتی ہوئی آبادی اس وقت ملک کا سب سے بڑا مسئلہ ہے،ایوب خان دورکے بعد کسی حکومت نے اس پر توجہ نہیں دی،یہ بدقسمتی ہے کہ حکومتوں نے اس معاملے کو سنجیدہ نہیں لیا،موجودہ حکومت نے اس وقت 1400علماء کی خدمات حاصل کررکھی ہیں اوراس حوالے سے آگاہی کیلئے پنجاب کے دس اضلاع میں پہلے فیز میں اس پر کام جاری ہے ،لوگوں کو آگاہی دی جارہی ہے کہ آبادی پر کیسے کنٹرول کرنا ہے۔
میرا ایوان سے مطالبہ ہے کہ اس معاملے پر سنجیدگی سے باعث کرائی جائے ،حکومت اور اپوزیشن کے ارکان کو اپنی اپنی تجاویز دینے کا موقع مل سکے تاکہ اس حوالے سے کوئی ٹھوس پالیسی بنائی جائے۔پاکستان اس وقت آبادی کے لحاظ سے دنیا کا 12ویں بڑا ملک ہے ،اتنی بڑی آبادی کیلئے کھانا،گھر اور نوکریوں کی بھی ضررت پیش آئے گی۔ بحث میں حصہ لیتے ہوئے تحریک انصاف کی رکن عائشہ اقبال نے کہا کہ آبادی میں اضافہ ٹائم بم ہے اس مسئلے کو سنجیدگی سے لینا چاہیے ۔لیگی رکن ذکیہ شاہنواز نے کہا اس مسئلے پر سنجیدگی سے توجہ دی جائے۔ آبادی میں اضافے کو کنٹرول کرنے کیلئے فنڈز کی کوئی کمی نہیں ،بہت سی این جی اوز فنڈنگ کرنے کو تیار ہیں صرف اس مسئلے پر سنجیدگی سے توجہ دینے کی ضرورت ہے
