بہاول پورپرامن خطہ ہے،علاقے کےلوگ امن پسند ہیں، ظہیرانورجپہ
یوتھ ویژن نیوز : ڈپٹی کمشنر ظہیر انور جپہ کی زیر صدارت دفتر کے کمیٹی روم میں ضلعی امن کمیٹی و بین المذاہب ہم آہنگ کمیٹی کا اجلاس منعقد ہوا جس میں ضلع بھر میں امن و امان کی صورتحال کا جائزہ لیا گیا۔
اجلاس میں ڈسٹرکٹ پولیس آفیسر سید محمد عباس، ایڈیشنل ڈپٹی کمشنر ہیڈ کوارٹر سمیرا ربانی، اسسٹنٹ کمشنر سٹی محمد عدیل خان، صدر انجمن تاجران سید اسرار حسین شاہ، علامہ عبدالرزاق شائق، مفتی جاوید مصطفی سعیدی، میر جمال، عبدالعلیم چیئرمین انجمن تاجران، احسان اللہ راحت، حافظ خرم سلیم، صادق جعفری، پرویز رحمت، عامر بھٹی، ظفر حسین نقوی، صادق جعفری اور دیگر ممبران کمیٹی موجود تھے۔
یہ بھی پڑھیں: دریائے ستلج پانی کی آمد فلڈ وارننگ
ڈپٹی کمشنر نے کہا کہ بہاول پور پر امن خطہ ہے اور اس علاقے کے لوگ امن پسند ہیں۔ انہوں نے کہا کہ امن و امان کی فضا برقرار رکھنے کے لیے ممبران امن کمیٹی اپنا کردار ادا کریں۔
ظہیر انور جپہ نے کہا کہ معاشرے میں اتحادو یگانگت کا جذبہ قائم رکھا جائے۔ انہوں نے کہا کہ اقلیتی برادری کی عبادت گاہوں کی حفاظت کی جائے۔ اجلاس میں امن کمیٹی کے ارکان نے منبر و محراب سے مذہبی رواداری کے درس کی ترویج کی یقین دہانی کرائی۔ بعد ازاں ملک میں امن و امان کے قیام اور سلامتی کے لئے دعا کی گئی۔