بھاولپورمیوزیم کی ثقافتی گیلریاں یہاں کی دستکاریوں خطہ کےہنر مند لوگوں کا پتہ دیتی ہیں،آسڑیا کی سفیر میگ آنڈریا وک
یوتھ ویژن نیوز: عجائب گھر تاریخی ورثہ کی حفاظت اور تعلیم و ترویج کے لیے اہم کردار ادا کرتے ہیں۔ یہ قومی و بین الاقوامی سطح پر جذبہ خیر سگالی کو تقویت دیتے ہیں اور ثقافتوں کے مابین پل کا کردار ادا کرتے ہیں۔
بہاول پور میوزیم علاقائی ثقافت اور ریاست بہاول پور کی شان و شوکت کا بہترین ترجمان ہے۔ میوزیم کی ثقافتی گیلریاں یہاں کی دستکاریوں اور اس خطہ کےہنر مند لوگوں کا پتہ دیتی ہیں۔ ان خیالات کا اظہار آسڑیا کی سفیر میگ آنڈریا وکH.E. Mrs.Mag.ANDREA WICKE نے گزشتہ روز اپنے دورہ میوزیم کے موقع پر کیا۔ انھوں نے کہا کہ آثار قدیمہ گیلری میوزیم کا قیمتی اثاثہ ہے جو صدیوں کی تہذیب اور نسل انسانی کے ارتقائی مراحل کو عیاں کرتی ہے۔
قبل ازیں ڈائریکٹر بہاول پور میوزیم محمد زبیر ربانی نے آسڑین سفیر کا استقبال کیا۔ اس موقع پر ڈپٹی ڈائریکٹر رشید احمد ارشد، کیمسٹ سعدیہ نورین، افیسر تعلقات عامہ نادیہ نورین و دیگر ان کے ہمراہ تھے۔ ڈائریکٹر میوزیم محمد زبیر ربانی نے انھیں بریف کرتے ہوئے بتایا کہ ریاست بہاول پور برصغیر کی دوسری بڑی اسلامی ریاست تھی جو فلاحی ریاست کا درجہ رکھتی تھی۔
بہاول پور میوزیم کے قیام سے قبل ریاستی دور میں یہاں دو تین میوزیم پہلے سے موجود تھے تاہم بہاول پور میوزیم تاریخ، ثقافت، آرٹ، سکہ جات، مخطوطات و خطاطی اسلامی فنون اور ریاست بہاول پور کی اشیاء پر مشتمل جنوبی پنجاب کا واحد میوزیم ہے۔ محمد زبیر ربانی نے اس موقع پر آسڑیا کی سفیر کو سرائیکی اجرک اور سونئیر بھی پیش کیا۔
