پاکستا ن کی عالمی سطح پر ایک اور سفارتی کامیابی ، 2022کے لیے اقوام متحدہ کے گروپ آف 77 اینڈ چائنا کا چیئرمین منتخب ، مشترکہ معاشی مفادات کو فروغ دینے کے عزم کا اعادہ
اقوام متحدہ۔ (واصب ابراہیم غوری ):پاکستان عالمی سطح پر ایک اور سفارتی کامیابی حاصل کرتے ہوئے 2022کے لیے اقوام متحدہ کے 134 ترقی پذیر ممالک کے اتحاد پر مشتمل گروپ ، گروپ آف 77 اینڈ چائنا کا چیئرمین منتخب ہو گیا ہے ۔
اقوام متحدہ میں پاکستان کے مستقل مندوب منیر اکرم نے گزشتہ روز پاکستان کےبطور چیئرمین انتخاب کے بعد گروپ آف 77 کے وزرائے خارجہ کے سالانہ ورچوئل اجلاس سے خطاب کرتے ہوئے کہا کہ وہ گروپ کے مفادات اور مقاصد کو فروغ دینے میں شفافیت، شمولیت اور معروضیت کی بنیاد پر کام کریں گے۔ انہوں نے کہا کہ پاکستان کا 2022 کے لیے جی۔77 اینڈ چائنا کا چیئرمین منتخب ہونا ہمارے لیے فخر کا باعث ہے۔
انہوں نے کہا کہ اقوام متحدہ میں جی۔77 اینڈ چائناکے تمام ممالک کے اجتماعی اقتصادی مفادات کو فروغ دینے کے لیے پاکستان آئندہ سال آغاز پر جمہوریہ گنی سے گروپ کی سربراہی کا چارج لے گا۔
اقوام متحدہ کے گروپ آف77کا قیام 1964 میں عمل میں لایا گیا تھا اور پاکستان نے 3بار (1976،1992 اور 2007 میں)ا س گروپ کی سرابراہی کی ہے ۔گزشتہ روز جمہوریہ گنی کے خارجہ امور و بین الاقوامی تعاون کے وزیر کی چیئرمن شپ میں ہونے والے اجلاس کے آغاز میں پاکستان کے وزیر خارجہ شاہ محمود قریشی ،
اقوام متحدہ کی جنرل اسمبلی کے صدر عبداللہ شاہد اور اقوام متحدہ کے سیکرٹری جنرل انتونیو گوتریش نے بھی خطاب کیا۔
اس موقع پر پاکستانی مندوب منیر اکرم نے کہا کہ جی۔77 کو خوفناک چیلنجز کا سامنا ہے ، کورونا وائرس کی وبا ، پائیدار ترقی کے اہداف (ایس ڈی جیز) کا حصول اور گروپ کے متعین کردہ آب و ہوا کے اہداف کو آگے بڑھانا مشکل ہے لیکن گروپ کے اتحاد اور یکجہتی سے ہمیں یقین ہے کہ جی۔77 اینڈ چائنا ان تما م چیلنجز پر ابو پانے اور اہداف کے حصول میں کامیاب ہو گا۔
اجلاس کے اختتام پر پاکستانی مندوب منیر اکرم نے رواں سال کے دوران جمہوریہ گنی کے بھرپور تعاون پر شکریہ ادا کیا اور ان تمام ممالک، وزرا اور مندوبین کا شکریہ ادا کیا جنہوں نے پاکستان کو گروپ کا چیئرمین منتخب ہونے پر مبارکباد دی ہے۔
