اسلامیہ یونیورسٹی بہاولپور میں پہلے نیشنل کیمپنگ فیسٹیول کا انعقاد
بہاولپور (یاسر ملک سے ) اسلامیہ یونیورسٹی بہاولپور میں پہلا نیشنل کیمپنگ فیسٹیول منعقد ہوا۔ یہ ایونٹ ڈیپارٹمنٹ آف ٹورازم اینڈ ہاسپٹیلٹی ، کراس روٹ کلب ، آئی یو بی دوست اور ٹورازم ڈیپارٹمنٹ پنجاب کے تعاون سے منعقد ہوا۔ اس پروگرام کا مقصد جنوبی پنجاب خاص طور پر بہاولپور میں سرمائی سیاحت کا فروغ ہے۔ جس طرح لوگ موسم گرما میں شمالی علاقہ جات کا رخ کرتے ہیں۔ نومبر سے مارچ تک نسبتاً بہتر موسم کی بدولت بہاولپور کے محلات اور حویلیاں ، روہی کے قلعے ، لال سونہارہ کے جنگلات، اچ شریف کے مزارت اور مساجد، ہاکٹرہ تہذیب کے آثار اور یہاں کا خوبصورت کلچر سرمائی سیاحت کے لیے بھرپور مواقع فراہم کرتا ہے۔ اس موقع پر اپنے خطاب میں پروفیسر ڈاکٹر جواد اقبال ڈین فیکلٹی آف مینجمنٹ سائنسز نے کہا کہ اسلامیہ یونیورسٹی بہاولپور میں وائس چانسلر انجینئر پروفیسر ڈاکٹر اطہر محبوب کی خصوصی ہدایت اور موجودہ حکومت کی سیاحت کے فروغ کے لیے اقدامات کی بدولت یونیورسٹی نے سیاحت کے لیے نہ صرف تدریسی شعبہ قائم کیا بلکہ ایک ڈائریکٹوریٹ کا قیام بھی عمل میں آیا۔ انہوں نے کہا کہ جنوبی پنجاب کوہ سلیمان بلند و بالا پہاڑوں اور چولستان کے وسیع صحرا کا مرکز ہے اور موسم سرما میں ٹورازم کے لیے نہایت موزوں ہے۔ کراس روٹ کلب کے مکرم خان ترین نے کہا کہ چولستان میں موجود 32قلعے اور ڈیزٹ سفاری چولستانی علاقے بہت موزوں ہیں۔ انہوں نے نیشنل کیمپنگ فیسٹیول کے انعقاد پر وائس چانسلر انجینئر پروفیسر ڈاکٹر اطہر محبوب کا خصوصی شکریہ ادا کیا۔ اس موقع پر سلمان قریشی ڈائریکٹر آئی یو بی دوست نے دیرپاسیاحت کے فروغ کے لیے اقدامات سے آگاہ کیا۔ زبیر احمد صدیقی پی ٹی وی کے سینئر اینکر نے کہا کہ بہاولپور شاندار شہر ہے اور اسلامیہ یونیورسٹی بہاولپور نے کیمپنگ فیسٹیول کی شاندار میزبانی کی ہے۔ نامور صحافی و ادیب عبیداللہ نے کہا کہ شمالی علاقہ جات میں سیاحت دسمبر کے مہینے میں ختم ہو جاتی ہے۔ مڈ کنٹری ٹورازم بہاولپور بہترین مرکز ثابت ہو سکتا ہے۔ پروگرام کے میزبان ڈاکٹر عمران رشید نے نیشنل کیمپنگ فیسٹیول میں شرکت پر ملکی اور غیر ملکی مندوبین کا شکریہ ادا کیا۔ اس ایک روزہ فیسٹیول میں ملک بھر سے 150سے زائد موٹر بائیکرز نے شرکت کی۔ بغدادالجدید کیمپس میں کیمپ نائٹ کے علاوہ TDCPڈبل ٹریکر بس میں بہاولپور کے تاریخی مقامات کی سیر کی جن میں بغدادالجدید ریلوے اسٹیشن ، سنٹرل لائبریری، میوزیم، وکٹوریہ ہسپتال ، چوک فوارہ، نور محل، بہاولپور کے قدیمی دروازے اور قلعہ ڈیراورکا دورہ کیا۔