اسلامیہ یونیورسٹی بہاولپور کے زیر اہتمام سٹارٹ اپ ایکسپو آئیڈیاز2021 چیلنج کا اہتمام

بہاولپور (قاری عاشق حسین سے ) اسلامیہ یونیورسٹی بہاولپور کی انٹرپرینیور سوسائٹی اسلامیہ یونیورسٹی بہاولپور کے زیر اہتمام سٹارٹ اپ ایکسپو آئیڈیاز2021 چیلنج کا اہتمام کیا گیا۔ اس موقع پر اسلامیہ یونیورسٹی بہاولپور سمیت مختلف تعلیمی اداروں کے طلباء وطالبات نے بھرپور شرکت کرتے ہوئے نئے سماجی اور کاروباری آئیڈیازپیش کیے۔ تقریب کا افتتاح کرتے ہوئے ڈائریکٹر سٹوڈنٹس آفیئرز رضوان مجید نے کہا کہ ایونٹ میں پیش کیے گئے طلباء وطالبات کے نئے آئیڈیاز ان کی بہترین ذہنی صلاحتوں کے حامل ہیں اوروہ موجودہ دور کے سماجی و معاشی چیلنج کے مطابق قومی و عالمی مقابلے کی فضا میں بہترین کاروباری آئیڈیاز پیش کر رہے ہیں جن پر عملدرآمد کر کے قومی ترقی میں مثبت تبدیلی لائی جا سکتی ہے۔ ڈائریکٹر اکیڈمکس ڈاکٹر مکشوف احمد نے کہا کہ اسلامیہ یونیورسٹی بہاولپور میں ہونے والی تقریب میں بہاولپور شہر اور مضافاتی علاقوں سے طلباء کی شرکت ان کی مثبت سرگرمیوں کی طرح موجودرجحان کو ظاہر کرتی ہے۔ ڈپٹی ڈائریکٹر سٹوڈنٹس آفیئرز ڈاکٹر اظہر حسین نے کہا کہ اسلامیہ یونیورسٹی بہاولپور میں 27سے زائد سٹوڈنٹس سوسائٹیز کام کر رہی ہیں اور آج کا میگا ایونٹ انٹرپرینیورسوسائٹی کے زیر اہتمام منعقد کیا گیا جس میں اساتذہ اورطلباء کی شرکت انتہائی خوش آئند ہے۔ ایونٹ میں شریک طلباء وطالبات نے مختلف سٹالز پر اپنے سوشل اور بزنس آئیڈیاز پیش کیے۔