رضوان اور شان ملتان سلطانز کی دوسرے جیت کے ہیرو،لاہورقلندرز 206 رنز کے ریکارڈ سکور کا دفاع کرنے میں ناکام
کراچی۔ (علی رضا غوری سے ):کپتان محمدرضوان اور شان مسعود پر مشتمل دفاعی چیمپئن ملتان سلطانز کی اوپننگ جوڑی نے کلاسیکل بیٹنگ کا مظاہرہ کرتے ہوئے اپنی ٹیم کو لاہورقلندرز کے خلاف 7 وکٹوں کی فتح سے ہمکنار کیا، پلیئر آف دی میچ شان مسعود کو قرار دیا گیا۔
نیشنل اسٹیڈیم کراچی میں ہفتہ کوکھیلے گئے ایچ بی ایل پاکستان سپر لیگ (پی ایس ایل)کے تیسرے میچ میں شان مسعود 76 رنز کی خوبصورت اننگز کھیل کر آئوٹ ہوئے، انہوں نے 35 گیندوں پر 11 چوکوں اور 2 چھکوں کی مدد سے 73 رنز بنائے۔
شان اور رضوان نے ملتان سلطانز کو محض 86 گیندوں پر 150 رنز کا شاندار اسٹارٹ فراہم کیا۔تاہم دونوں یکے بعد دیگرے آئوٹ ہوگئے۔ رضوان نے 42 گیندوں کا سامنا کرتے ہوئے 42 گیندوں پر 69 رنز کی دلکش اننگز کھیلی۔ایک موقع پرملتان سلطانز کو مشکل صورتحال کا سامنا تھا کیونکہ رائیلی روسو، ٹم ڈیوڈ اور صہیب مقصودآگے پیچھے آئوٹ ہوگئے تاہم خوشدل شاہ نے ناقابل شکست 4 گیندوں پر 18 رنز بناکر ٹیم کو حیرت انگیز فتح سے ہمکنار کیاجس میں 3 چوکے اور ایک چھکا شامل تھا۔
خوشدل نے یہ تمام رنز حارث رئوف کی آخری چار گیندوں پربنائے جس میں وننگ چھکا بھی شامل تھا ۔یہ پی ایس ایل کی تاریخ میں ہدف کا تعاقب کرتے ہوئے سب سے بڑا سکور تھا۔دلچسپ بات یہ ہے کہ شاہین شاہ آفریدی، حارث رئوف اور راشد خان جیسے بولرز کی موجودگی میں لاہورقلندرز ایک بڑے سکور کا دفاع کرنے میں ناکام رہی۔ شاہین نے 40ر نز دیکر 3 وکٹیں حاصل کیں ۔اس سے قبل قلندرز کے فخرزمان نے اپنی ٹیم کے سکور کو 200 کے پار پہنچانے میں نمایاں کردار اداکیا۔
فخر نے تابڑتوڑ ہٹنگ کے ذریعے محض 35 گیندوں پر 73 رنز سکور کئے جس میں 11 بائونڈریز اور 2اڑان والے چھکے بھی شامل تھے۔ خاص طور پر فخر نے فاسٹ بولر عمران خان کی جی بھر کر پٹائی کی اور ان کی گیندوں پر 6 چوکے اور ایک چھکا لگایا۔عمران نے 3.4 اوورز میں 52 رنز دئیے اور کوئی وکٹ حاصل نہ کرسکے۔کامران غلام نے جن کا ایک کیچ بھی چھوٹا،نے 31 گیندوں پر 43 رنز بنائے جس میں 3 چھکے بھی شامل تھے
