ڈپٹی کمشنربہاول پور کا بی وی ایچ کے شعبہ ایمرجنسی کا دورہ
بہاول پور(عمران قذافی سے )بہاول پور کے نواحی علاقہ کلانچ والا روڈ پر افسوسناک واقعہ میں زخمی ہونے والے بچوں اور رکشہ ڈرائیور کو ریسکیو 1122نے بروقت بہاول وکٹوریہ ہسپتال میں منتقل کردیا۔ڈپٹی کمشنربہاول پور عرفان علی کاٹھیا نے بی وی ایچ کے شعبہ ایمرجنسی پہنچ کر حادثہ میں زخمی ہونے والے بچوں کو علاج معالجہ کی فراہم کردہ سہولیات کا جائزہ لیا۔ انہوں نے ایم ایس بہاول وکٹوریہ ہسپتال اور ڈائریکٹر ایمرجنسی کو ہدایت کی کہ زخمیوں کو بہتر طبی امداداور دیکھ بھال کی سہولت فراہم کی جائے۔تفصیلات کے مطابق آج صبح کلانچ والا روڈ پر موٹر سائیکل رکشہ سکول کے بچوں کو سکول لے جاتے ہوئے ٹرالر کی زد میں آگیا تھا۔پنجاب ایمرجنسی سروس ریسکیو 1122کی جانب سے زخمی بچوں اور رکشہ ڈرائیور کو فوری طور پر علاج معالجہ کے لیے بہاول وکٹوریہ ہسپتال کے شعبہ حادثات منتقل کردیا گیا۔
