بھارتی سپریم کورٹ نے مقبوضہ جموں کشمیر میں حدبندی کے خلاف درخواست کو مسترد کردیا
یوتھ ویژن نیوز( ویب ڈسک ) نئی دہلی بھارتی سپریم کورٹ نے جموں اور کشمیر میں حدبندی کے عمل کو برقرار رکھتے ہوئے اس کے خلاف دائر درخواست کو مسترد کردیا ہے۔
عدالت نے کہاکہ حد بندی سے وادی میں انتخابات کے لیے راستہ ہموار ہوا ہے۔عدالت عظمی نے جموں کشمیر میں اسمبلی اور لوک سبھا کے حلقوں کو دوبارہ ترتیب دینے کے لیے حد بندی کمیشن کی تشکیل کے حکومت کے فیصلے کو چیلنج کرنے والی درخواست کو مسترد کر دیا۔
سرینگر کے رہائشی درخواست دہندگان ، حاجی عبدالغنی خان اور محمد ایوب متو نے استدلال کیا کہ جولائی 2004ء میں حد بندی کمیشن کے جاری کردہ ایک خط کے مطابق 2026ء کے بعد پہلی مردم شماری تک تمام ریاستوں اور مرکز کے زیرانتظام علاقوں کی موجودہ اسمبلی نشستوں کی تعداد کو تبدیل نہیں کیا جا سکتا۔
رپورٹ کے مطابق انہوں نے کہا کہ آسام، اروناچل پردیش، منی پور اور ناگالینڈ میں گزشتہ 51 سالوں سے حدبندی نہیں کی گئی ہے۔
انہوں نے یہ دلیل بھی دی کہ جموں کشمیر تنظیم نو ایکٹ 2019ء کے تحت ، الیکشن کمیشن واحد ادارہ ہے جسے حدبندی کرنے کا اختیار دیا گیاہے نہ کہ حدبندی کمیشن جیسے عارضی ادارے کو ۔ تاہم بھارتی سپریم کورٹ نے ان دلائل کو مسترد کرتے ہوئے اور ہمیشہ کی طرح مودی حکومت کی ہاں میں ہاں ملاتے ہوئے حدبندی کو جائز قرار دیا۔
