فواد چودھری کی بازیابی کی درخواست لاہور ہائی کورٹ سے خارج

یوتھ ویژن نیوز(مبشر بلوچ سے ) لاہور ہائی کورٹ کے جج جسٹس طارق سلیم شیخ نے پاکستان تحریک انصاف کے ہیڈ آف میڈیا افیئرز فواد چودھری کی بازیابی کی درخواست خارج کردی ہے

عدالت عالیہ کے جسٹس طارق سلیم شیخ کی عدالت میں آئی جی پنجاب عثمان انور، ایڈیشنل ایڈووکیٹ جنرل پنجاب جواد یعقوب اور فواد چوہدری کے وکیل پیش ہوئے۔

یہ بھی پڑھیں: کالج آف آرٹ اینڈ ڈیزائن اسلامیہ یونیورسٹی بہاول پور اور بہاول پور میوزیم کے اشتراک سے دوسری بین الاقوامی واٹر کلر نمائش کا انعقاد

لاہور ہائی کورٹ کے جج نے کہا کہ یہ کیس تو عدالت میں چیلنج نہیں، اب یہ حراست غیر قانونی نہیں، یہ درخواست قابل سماعت تھی لیکن اب قابل سماعت نہیں۔

اس موقع پر فواد چوہدری کے وکیل نے عدالت کے گوش گزار کیا کہ مبینہ وقوعہ تو اسلام آباد میں نہیں ہوا۔

عدالت عالیہ کے جج جسٹس طارق سلیم کے روبرو آئی جی پنجاب عثمان انور پیش ہوئے اور بتایا کہ عدالت کے کسی حکم کی عدولی نہیں کی۔

انہوں نے مؤقف اختیار کیا کہ موبائل سگنلز بہت کمزور تھے، اس لیے مجھ سے رابطہ نہیں ہوسکا، مجھے پتا چلا ہے کہ فواد چوہدری اسلام آباد پولیس کے پاس ہیں

یہ بھی پڑھیں: پاکستان کے انٹیلی جنس اداروں کی بڑی کامیابی، بھارت کا مقبوضہ کشمیرمیں مبینہ دراندازی کا ڈرامہ بے نقاب

آئی جی پنجاب نے گوش گزار کیا کہ فواد چوہدری پنجاب پولیس کی تحویل میں نہیں، مجھےکنفرم نہیں ہے لیکن پتا چلا کہ وہ اسلام آباد پہنچ چکے ہیں۔

جسٹس طارق سلیم شیخ نے دوران سماعت فواد چوہدری کے وکیل سے استفسار کیا کہ آپ اس عدالت سے کیا چاہتے ہیں؟ آپ کی استدعا کیا ہے؟ اس پر فواد چوہدری کے وکیل نے کہا کہ ہم چاہتے ہیں فواد چوہدری کی گرفتاری غیر قانونی قرار دی جائے۔

عدالت عالیہ کے جج نے اس پر استفسار کیا کہ فواد چوہدری کی گرفتاری میں غیر قانونی کیا ہے؟ انہیں گرفتار کیا گیا اور ریمانڈ کیلئے لاہور کی متعلقہ عدالت میں پیش کیا گیا، اگر آپ مقدمے کا اخراج چاہتے ہیں تو اسلام آباد ہائی کورٹ اب درست فورم ہے۔