ایشیا کپ:سری لنکا نے شاہینوں کی لنکا ڈھا دی،چھٹی مرتبہ چیمپئن بن گیا

یوتھ ویژن نیوز (عاقب غوری سے ) ایشیا کپ کے فائنل میچ میں سری لنکا نے شاہینوں کی لنکا ڈھا دی 171 رنز کے تعاقب میں پاکستان کی ٹیم 20 اوورز میں صرف 147 رنز بنا سکی۔ پاکستان 23 رنز سے فائنل میچ ہار گیا۔

 پاکستان کی جانب سے محمد رضوان 49 گیندوں پر 55 رنز بنا کر نمایاں بلے باز رہے جب کہ افتخار احمد 32، بابراعظم 5، آصف علی اور فخرزمان بغیرکوئی رن بنائےآوٹ ہوئے۔

ایشیا کپ کے فائنل میچ میں سری لنکا کی جانب سے پرامود ماڈوشن نے چار اور ہسارنگانے تین وکٹیں حاصل کیں۔پاکستان ٹیم کے کپتان بابر اعظم 5 رنز بنانے کے بعد 22 پر آؤٹ ہوئے تو اگلی ہی گیند پر فخر زمان بھی بولڈ ہوگئے تھے۔ وہ صفر پر پویلین لوٹے۔

محمد رضوان اور افتخار احمد نے 59 گیندوں پر 71 رنز کی شاندار پارٹنر شپ بنائی لیکن 93 کے مجموعے اسکور پر افتخار احمد آؤٹ ہوگئے، انہوں نے 31 گیندوں پر 32 رنز بنائے تھے۔

سری لنکا نے پاکستان کو تیسری بار ایشیا کپ کے فائنل میں شکست دی ہے. سری لنکا کی ٹیم اس سے قبل 1986 اور 2014 میں بھی پاکستان کو فائنل میں ہراچکی ہے۔

واضح رہے کہ سری لنکا کی جانب سے راجاپکسا نے 71 رنز کی شاندار اور ناقابل شکست اننگز کھیلی جب کہ ہاسا رنگا 36 اور ڈی سلوا 28 رنز بنا کر نمایاں رہے۔

سری لنکا کی ٹیم 11 ویں مرتبہ ایشیا کپ کا فائنل کھیل رہی ہے جب کہ قومی ٹیم کو پانچویں مرتبہ فائنل میں پہنچنے کا اعزاز حاصل ہوا ہے۔

پاکستان کی کرکٹ ٹیم اب تک 2 مرتبہ جب کہ سری لنکا کی ٹیم 5 مرتبہ ٹرافی اپنے نام کرچکی ہے۔

گرین شرٹس دس سال سے یہ ٹائٹل جیتنے کے منتظر ہیں جب کہ سری لنکا نے آخری مرتبہ 2014 میں ایشیا کپ جیتا تھا۔