13اگست کے جلسے سے پہلےتحریک انصاف کے مزید 13 رہنماؤں کی گرفتاری متوقع
اسلام آباد( مبین خان سے ) یوتھ ویژن نیوز کے ذرائع کے مطابق شہباز گل کی گرفتاری کے بعد تحریک انصاف کے سرکردہ مزید 13 اہم رہنماؤں کی گرفتاری کا خدشہ ظاہر کیا جارہا ہے۔ دوسری جانب اسلام آباد پولیس کی جانب سے شیخ رشید کی گرفتاری کیلئے اسلام آباد رہائش گاہ پر چھاپے بھی مارے گئے ہیں۔
یوتھ ویژن نیوز کے ذرائع کے مطابق ممکنہ طور پر پی ٹی آئی کے 13 رہنماؤں کوگرفتار کیا جا سکتا ہے، جن میں فواد چودھری ، اسد عمر، مراد سعید، علی زیدی اور قاسم سوری کے نام بھی شامل ہیں۔
یوتھ ویژن نیوز کو ذرائع نے بتایا کہ پی ٹی آئی رہنماؤں کو ایف آئی اے یا پولیس کی جانب سے گرفتار کیا جا سکتا ہے۔
تفصیلات کے مطابق ذرائع نے کہا ہے کہ لاہور میں 13 اگست کے جلسے سے قبل دیگر رہنماؤں کی ممکنہ گرفتاری کا خدشہ ہے۔
دوسری طرف شہباز گل کی گرفتاری کے بعد پی ٹی آئی کی اعلیٰ قیادت کا اجلاس عمران خان کی صدارت میں شروع ہو گیا ہے۔ اجلاس میں شہباز گل کی گرفتاری سے پیدا ہونے والی صورت حال پر غور کیا جا رہا ہے۔
بابر اعوان نے رہنماؤں کو قانونی پہلوؤں پر پارٹی قیادت کو بریفنگ دی، پارٹی رہنماؤں نے شہباز گل کی گرفتاری انتقامی کارروائی قرار دے دی۔