ق لیگ کس کی؟ چودھری شجاعت آج اہم اعلان کرینگے،پرویزالہٰی کے پی ٹی آئی سے اختلافات
لاہور ( ویب ڈسک ) ق لیگ پر قبضے کی جنگ حتمی مراحل میں داخل ہوگئی، پاکستان مسلم لیگ کے سربراہ و سابق وزیراعظم چودھری شجاعت حسین یکم اگست شام 5 بجے، اسلام اباد میں اپنی رہائش گاہ پر اہم پریس کانفرنس سے خطاب کریں گے،جبکہ دوسری طرف ذرائع کا کہنا ہے کہ وزیراعلیٰ پرویزالہٰی کے کابینہ کی تشکیل کے معاملے پر اختلاف پیدا ہوگئےہیں۔
تفصیلات کے مطابق سابق وزیراعظم عمران خان نے گزشتہ روز لاہور کے دورے کے دوران چوہدری پرویز الٰہی اور مونس الٰہی سے ملاقات کی جبکہ اس کے علاوہ انہوں نے پنجاب کی کابینہ میں رہنے والے سابق وزراءسے بھی الگ الگ ملاقاتیں کیں،عمران خان کی خواہش ہے کہ پنجاب کی کابینہ مختصر رکھی جائے کیونکہ ان کی نظر میں ملک کے معاشی حالات درست نہیں ،اس لیے وہ سمجھتے ہیں کہ کابینہ چھوٹی ہونی چاہیے اور اس کے اراکین کی تعداد 20 سے زائد نہ ہو، لیکن ق لیگ اس پر خوش نہیں ہے اور پی ٹی آئی ذرائع کا کہناہے کہ پرویز الہٰی زیادہ اراکین پر مبنی کابینہ رکھنا چاہتے ہیں کیونکہ کم وزراءکے ساتھ پنجاب میں کارکردگی متاثر ہوسکتی ہے
