عالمی مارکیٹ میں خام تیل کی قیمتوں میں اٹھ فیصدکے قریب گر گئیں
نیو یارک (مظہر چشتی سے ) – عالمی مارکیٹ میں خام تیل کی قیمتوں میں سات اعشاریہ سات دو فیصد کی غیرمعمولی کمی ہو گئی۔
کھپت میں کمی کے باعث عالمی مارکیٹ میں خام تیل کی قیمتوں میں کمی جاری ہے۔ امریکی ڈبلیو ٹی آئی خام تیل کی فی بیرل قیمت99 ڈالراور برطانوی برینٹ خام تیل کی 95.64 ڈالر ہو گئی۔
عالمی مارکیٹ میں گندم اور سویابین کے نرخوں میں بھی کمی ہوئی۔ گندم کی فی ٹن قیمت3 یورو کی کمی سے314.25 یورو ہو گئی جبکہ 25کلو گرام سویابین کی قیمت 2.72 ڈالرکی کمی سے 15.93 ڈالر پر آگئی۔
عالمی مارکیٹ میں سونے کی قیمت بھی9 ماہ کی کم ترین سطح پر آ گئی۔ سونےکی فی اونس قیمت9 ڈالرکی کمی سے1723 ڈالراور چاندی کی فی اونس قیمت29 سینٹ کی کمی سے18.83 ڈالر ہو گئی۔ پلاٹینم34 ڈالر سستا ہونے کے بعد فی اونس826 ڈالر کا ہو گیا۔
دوسری طرف کئی دن کی مسلسل کمی کے بعد ملائیشین پام آئل کی فی ٹن قیمت میں43 ڈالر کا اضافہ دیکھا گیا جس کے بعد فی ٹن پام آئل933 ڈالر کا ہو گیا۔
کساد بازاری کے خدشات امریکی حصص بازاروں کو بھی لے ڈوبے۔ ڈاؤ جونز انڈسٹریل انڈیکس192 پوائنٹ گر گیا۔ نیسڈیک کمپوزٹ انڈیکس میں 108پوائنٹ کی کمی ہوئی۔
ایشیائی حصص بازاروں پر نظر ڈالیں تو وہاں بھی مندی کا رجحان دیکھا گیا۔ ٹوکیو اسٹاک مارکیٹ475 پوائنٹ کمی پر بند ہوئی۔ ہانگ کانگ اسٹاک مارکیٹ 280پوائنٹ گری جبکہ شنگھائی اسٹاک مارکیٹ ایک فیصد کمی پر بند ہوئی۔
ادھر آئی ایم ایف نے امریکا کی شرح نمو2.9فیصد سے کم کرکے2.3 فیصد کر دی۔ آئی ایم ایف کا کہنا ہے کہ مہنگائی میں اضافہ امریکا اور عالمی معیشت کیلئے خطرہ ہے۔