لاہور: ن لیگ کا مہنگائی مکاؤ مارچ مریم نواز اور حمزہ شہبازکی قیادت میں روانہ
مسلم لیگ ن کی نائب صدر مریم نواز اور حمزہ شہباز مہنگائی مکاو مارچ کے سلسلے میں ماڈل ٹاون لاہور سے اسلام آباد کے لیے روانہ ہو گئے۔
روانگی سے پہلے مریم نواز نے اپنی والدہ کی قبر پر حاضری دی اور فاتحہ پڑھی۔
قبل ازیں اپنے پیغام میں قائد حزب اختلاف شہباز شریف کا کہنا تھا کہ عوام مہنگائی کا عذاب نازل کرنے والوں کو آخری دھکا دیں، مریم اور حمزہ کے ساتھ نکلیں اور ظالم حکومت سے نجات حاصل کریں،عوام نہ نکلے تونالائق حکمران پورا پاکستان کھا جائے گا۔
ن لیگ کا یہ مارچ آج رات گوجرانولا میں قیام کرے گا جہاں مریم نواز اور حمزہ شہباز جلسے سے خطاب کریں گے۔
خیال رہے کہ گزشتہ روز اپنے ترجمان مسلم لیگ ن مریم اورنگزیب نے کہا تھا کہ مہنگائی مکاؤ مارچ کشمیر فروشوں سے نجات کا دن ہے
میڈیا سے گفتگو میں انہوں نے کہا کہ مہنگائی مارچ نااہل ٹولے کے خلاف عدم اعتماد ثابت ہو گا اور مہنگائی مکاؤ مارچ مہنگائی کے کپتان سے نجات کا مارچ ہے۔
انہوں نے کہا کہ مہنگائی مکاؤ مارچ کشمیر فروشوں سے نجات کا دن ہے اور اب فیصلہ کن گھڑی آ گئی ہے۔ عوام کے حق کے ساتھ کھڑے ہونا ہے۔ عوام گھروں سے نکلیں اور اپنے گھروں کو مہنگائی کے عذاب سے بچائیں۔
مریم اورنگزیب نے کہا کہ مزدوروں، کسانوں اور محنت کشوں کو مارچ میں شرکت کی دعوت دیتے ہیں جبکہ حمزہ شہباز اور مریم نواز گوجرانولہ میں جلسے سے خطاب کریں گے۔انہوں نے کہا کہ مہنگائی مکاؤ مارچ رات گوجرانوالہ میں قیام کرے گا۔