اے ٹی ایم میں ڈیوائس لگاکر پیسے نکالنے والے انٹرنیشنل گروہ کے 3 کارندے گرفتار
راولپنڈی:(قاری عاشق حسین سے ) وفاقی تحقیقاتی ادارے (ایف آئی اے) نے اے ٹی ایم میں ڈیوائس لگاکرپیسے نکالنے والے بین الاقوامی گروہ کے کارندوں کو گرفتارکرلیا۔
ایف آئی اے کے مطابق راولپنڈی کی ٹیم نے کارروائی کرتے ہوئے گروہ کے تین ارکان کو ٹیکسلا سے گرفتار کیا ہے۔
ایف آئی اے حکام کا بتانا ہےکہ گرفتار تین ملزمان سگے بھائی ہیں جن میں عمران، خالد اور فرحان شامل ہیں۔
ایف آئی اے کا کہنا ہےکہ یہ گروہ برازیل سے آپریٹ کررہا ہے اور غیر ملکی پاکستان آکرٹریننگ دیتے ہیں۔
ایف آئی اے کے مطابق ملزمان اے ٹی ایم کے ساتھ ڈیوائسز لگا کر کارڈز کا ڈیٹا اکٹھا کرتے تھے، وہ ڈیٹا بیرون ملک بھجوایا جاتا تھا اور ملزمان بعد میں اکاؤنٹ سے رقم نکال لیتے تھے۔
یاد رہے سیالکوٹ میں بھی ہیکرز نے اے ٹی ایم ہیک کرکے 28 لاکھ روپے نکال لیے تھے۔
تھانہ مراد پورپولیس کے مطابق بینک انتظامیہ نے بتایا کہ 16اکتوبرکوبینک عملے نے اے ٹی ایم میں 50 لاکھ روپے ڈالے تھے،17اکتوبر اتوار کی چھٹی کے بعد اگلے دن 18 اکتوبر کو جب چیک کیا گیا تو 28 لاکھ روپے کم تھے۔
بینک منیجرکی جانب سے دی گئی درخواست کے مطابق تحقیقات میں پتا چلا کہ واردات 17 اکتوبر کو دوپہر کو پیش آئی جس میں 3 ملزمان نے انٹرنیٹ کی مدد سے اے ٹی ایم کو پہلے ہیک کیا اور 28 لاکھ روپے نکال لیے۔
