جو بھی تشدد کرے گا اسے کچل دیا جائے گا،وزیر داخلہ کی پریس کانفرنس
اسلام آباد (یاسر ملک سے ) وزیر داخلہ کا کہنا ہے کہ جو بھی تشدد کرے گا اسے کچل دیا جائے گا۔ تفصیلات کے مطابق پارلیمنٹ لاجز میں انصار الاسلام کے کارکنوں کیخلاف کیے گئے پولیس آپریشن کے بعد وزیر داخلہ شیخ رشید احمد کی جانب سے پریس کانفرنس کی گئی۔ وزیر داخلہ نے کہا کہ اگر کوئی قانون ہاتھ میں لے گا تو پھر چیخیں نہ مارنا، جو بھی تشدد کرے گا اسے کچل دیا جائے گا، نتیجہ آپ بھگتیں گے، کانوں کو ہاتھ لگائیں گے۔
شیخ رشید احمد نے کہا کہ انصار لاسلام تحلیل ہو چکی ہے، کسی کو پرائیویٹ ملیشیا رکھنے کی اجاز ت نہیں ۔ یہ پرائیویٹ ملیشیا ہے ان کے 50 لوگ کپڑے تبدیل کر کے بھاگ گئے، پولیس نے ان سے 4 گھنٹے مذاکرات کیے پھر آپریشن کیا گیا، ان کے 19 لوگ ہمارے پاس ہیں، راستے میں آنے والوں کو بھی روکیں گے ۔
کسی ایم این اے کو گرفتار نہیں کیا یہ شوق سے تھانے میں بیٹھے ہوئے ہیں۔
پولیس پر تشدد کیا گیا ہے، سرکاری گاڑیوں کی ہوا نکالی گئی ۔ پی ڈی ایم کے سربراہ کی جانب سے دی جانے والی دھمکیوں پر شیخ رشید احمد نے کہا کہ مولانا فضل الرحمن نے کہا کہ ہم نے لاٹھیاں تیلوں میں ڈبو کے رکھی ہوئی ہیں ، ہم نے تو کوئی لاٹھی نہیں چلائی ۔ مولانا فضل الرحمن کا بڑا احترام ہے مگر آپ قانون کو ہاتھ لیں گے تو کوئی لحاظ نہیں ہوگا ۔
قانون سے آگے کوئی نہیں، گھیرائو سے پہلے 101سے ایک مرتبہ سوچنا ، جو بھی تشدد کرے گا اسے کچل دیا جائیگا ۔ جب قانون کو ہاتھ میں لینگے تو پھر چیخیں نہ مارنا، آپ پھنسیں گے ، کانوں کو ہاتھ لگائیں گے ،آپ اپنی بیوقوفی کی وجہ سے ساری زندگی نادم رہیں گے ۔ وزیر داخلہ نے مزید کہا کہ عدم اعتماد کی تحریک ناکام ہوگی، عمران خان سرخرو ہو کر نکلیں گے، یہ شکست کھائیں گے۔ ان سے 172بندے اکٹھے نہیں ہورہے، ان کو راہ فرار چاہیے۔
