امریکی ڈالر کے مقابلے روپیہ کی قدر میں بہتری، سٹاک مارکیٹ میں زبردست تیزی
کراچی:(مبشر بلو چ سے ) ملک بھر میں امریکی ڈالر کے مقابلے میں روپیہ تگڑا ہو گیا جبکہ پاکستان سٹاک مارکیٹ میں زبردست تیزی کے باعث سرمایہ کاروں کو اربوں روپے کا فائدہ ہوا ہے۔
سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر میں 6 پیسے کی کمی ریکارڈ کی گئی
دوسری طرف پاکستان سٹاک مارکیٹ میں 342.57 پوائنٹس کی زبردست تیزی ریکارڈ کی گئی، 100 انڈیکس 44803.58 پوائنٹس کی سطح پر پہنچ کر بند ہوا، پورے کاروباری روز کے دوران کاروبار میں 0.77 فیصد کی بہتری دیکھی گئی۔
کاروبار کے دوران 12 کروڑ 90 لاکھ 60 ہزار 91 شیئرز کا لین دین ہوا جس کے باعث سرمایہ کاروں کو 70 ارب روپے کا فائدہ ہوا۔
معاشی ماہرین کا کہنا ہے کہ وزیراعظم کی طرف سے قوم سے خطاب کے دوران عوام کو ریلیف اور متعدد پیکیج متعارف کروائے جانے کے بعد سرمایہ کاروں نے ٹریڈنگ کے دوران زبردست دلچسپی کا اظہار کیا جس کے باعث تیزی ریکارڈ کی گئی اور آئندہ دنوں میں مزید تیزی کی توقع ہے۔
