آواز فورم پاکستان کا کشمیر ڈے کے حوالے سے خصوصی اجلاس
بھاول پور( محمد اقبال سے ) آواز فورم پاکستان کا کشمیر ڈے کے حوالے سے خصوصی اجلاس منعقد ہوا۔ صدر آواز فورم سعید طاہر نے صدارت کی جبکہ ڈویژنل سپیشل ایجوکیشن آفیسر (ریٹائرڈ)، سینئر براڈ کاسٹر شازی حشمت مہمان اعزاز تھیں۔ نظامت کے فرائض ریاض بھٹہ نے انجام دئیے۔ اجلاس میں سینئر براڈکاسٹرز شعیب احمد، بلال بھٹی، سعید احمد سلطان، اظہر محمود، طلعت محمود، ام سلمی، عطیہ منیر سمیت محمد اقبال سانول، شہروز اشرف، ثمینہ ناز، رابعہ نور، ہنزہ گل، ریحانہ جبیں اور فاطمہ شریک تھیں۔صدرآواز فورم سعید طاہر نے گفتگو کرتے ہوئے کہا کہ بھارت کی ہٹ دھرمی کی وجہ سے مسئلہ کشمیر سنگین صورت حال اختیار کرچکا ہے اور عالمی برادری کی توجہ اس جانب مبذول کرانے کے لیے تمام پاکستانیوں کو اپنی سطح پر کردار ادا کرنا چاہئے۔ آواز فورم پاکستان کے پلیٹ فارم سے ہم کشمیری بھائیوں کو یقین دلاتے ہیں کہ پاکستان کے تمام آرٹسٹ اپنے اپنے محاذ پر ان کے لیے مصروفِ عمل ہیں اور پوری پاکستانی قوم کشمیری بھائیوں کے ہمراہ ہے۔ مہمانِ اعزاز سینئر براڈ کاسٹر شازی حشمت نے کہا کہ کشمیریوں کے حق خودارادیت کی جدوجہد ضرور رنگ لائے گی۔ اس موقع پر دیگر شرکا نے بھی یوم یک جہتی کشمیر کی اہمیت پر اپنے خیالات کا اظہار کیا۔ انہوں نے کہا کہ ہم مقبوضہ کشمیر کے بھائیوں کے کامیابی کے لیے دعاگو ہیں۔۔آواز فورم پاکستان کے اجلاس سینئر آرٹسٹ اختر بھٹی، مجیب بخاری، بلال بھٹی اور شعیب احمد سمیت احمدحسن اعوان کی ہمشیرہ کی صحت یابی کے لیے دعا ئے خیرکی گئی۔ اجلاس میں صدر سعید طاہرنے آواز فورم کے قافلے میں شریک ہونے والے آرٹسٹوں کو خوش آمدیدکہا اور اجلاس میں شریک دیگر آرٹسٹوں سے تعارف کا سیشن بھی ہوا۔مہمانِ اعزاز شازی حشمت نے اس موقع پر کہا کہ انہیں سینئر صداکاروں اور نئی آوازوں سے مل کر بہت خوشی ہوئی ہے۔ وہ پاکستان میں اور ملک سے باہر بھی آپ کے ساتھ ہیں اور آواز فورم کا آرٹسٹوں کو متحد رکھنے اور ان کی آواز بلند کرنے کا اقدام نہایت خوش آئند ہے۔ سینئر صداکار بلال بھٹی نے تجویز دی کہ آواز فورم کے پلیٹ فارم سے بلاامتیاز ملک بھر کے صداکاروں کے لیے کوشش کی جائیں جسے شرکا نے بے حد سراہا۔ اجلاس میں ریڈیو آرٹسٹوں کی فلاح و بہبود اور ریڈیوپروگراموں کی بہتری کے بارے میں بھی تبادلہ خیال کیا گیا۔ آواز فورم پاکستان کے اجلاس میں متفقہ طور پر فیصلہ کیا گیا کہ ریڈیو پاکستان بہاول پور کی ترقی و سربلندی کے لیے مشترکہ جدوجد کا عمل جاری رہے گا کیونکہ یہ بطور آرٹسٹ اس ادارے کا قرض ہے۔صدر آواز فورم سعید طاہر نے شرکا کو بتایا کہ مارچ کے آخری ہفتے میں آواز فورم ممبران کے لیے لال سوہانرا نیشنل پارک کے ایک روزہ ٹور کا اہتمام کیاجائے گا۔ اجلاس کے اختتام پر صحت و سلامتی اور ملک کی ترقی وسربلندی کے لیے بھی دعا کی گئی۔
