اپوزیشن کا احتجاج خود نمائی کے سوا کچھ نہیں،مہنگائی کی آڑ میں منفی سیاست کی جا رہی ہے:عثمان بزدار

لاہور(مبشر بلوچ سے)  وزیراعلیٰ پنجاب سردار عثمان بزدار نے کہا ہے کہ اپوزیشن کا احتجاج خود نمائی کے سوا کچھ نہیں۔ حکومت کو عام آدمی کے مسائل کا پورا ادراک ہے اور مہنگائی پر قابو پانے کیلئے ہر ممکن اقدام کیا جا رہا ہے۔ضلع کی سطح پر پرائس کنٹرول کمیٹیوں کو متحرک کر دیا گیا ہے جس سے اشیائے ضروریہ کی قیمتوں میں وقت کے ساتھ استحکام آ رہا ہے۔پرائس کنٹرول میکانزم پر تسلسل کے ساتھ عملدرآمد جاری رہے گا۔ وزیراعلیٰ عثمان بزدار نے کہا کہ اپوزیشن مہنگائی کی آڑ میں منفی سیاست کر رہی ہے۔موجودہ حالات میں انتشار کی سیاست کی کوئی گنجائش نہیں۔ اپوزیشن کو عوام کے مسائل سے کوئی غرض نہیں، انہیں صرف اقتدار کی تڑپ ہے۔اپوزیشن کا موجودہ حالات میں رویہ ملکی مفاد کے منافی ہے۔اپوزیشن جماعتیں عوام میں اپنی ساکھ کھو چکی ہیں۔