بہاولپور میں تعینات بیورکریسی کو عوامی مسائل سے کوئی سروکار نہیں،نواز ناجی
بہاولپور (یاسر ملک سے ) چیف ایگزیکٹو تحریک بحالی صوبہ بہاولپور محمد نواز ناجی نے کہا ہے کہ بہاول پور کے عوام کو مسائل کی چکی میں پیسا جارہا ہے بہاولپور میں تعینات بیورکریسی کو عوامی مسائل سے کوئی سروکار نہیں۔ وہ صرف فوٹو سیشن تک محدود ہے۔ فرعون صفت انتظامی افسران لوگوں کے اپنے دفاتر میں داخل ہی نہیں ہونے دیتے۔ بہاول پور کی ابتری کا یہ عالم ہے کہ ہرطرف گندگی بکھری پڑی ہے۔ سیوریج کے ناقص انتظام کے باعث پورا شہر گندے پانی کے ندی نالوں میں تبدیل ہو کر رہ گیا ہے سڑکیں ٹو ٹ پھوٹ کا شکار ہیں تجاوزات کی بھرمار ہے اور متعلقہ حکام بھتہ لے کر خود تجاوزات گرانے میں مصروف ہیں۔ پینے کا صاف پانی دستیاب نہیں۔ فلٹریشن پلانٹس کے فلٹر ناکارہ ہوچکے ہیں۔ اور کالا پانی دے رہے ہیں تخت لاہور کے مسلط کردہ افسران نے شہر کا حلیہ بگاڑ کر رکھ دیا ہے انہوں نے کہا کہ بہاول پور کو مسائل سے نکالنے کے لئے اس کی صوبائی بحالی ناگزیر ہوچکی ہے بہاولپور سے بے رحم افسران کو نکالا جائے اور ان جگہ انسان کو انسان سمجھنے والے آفیسر تعینات کئے جائیں۔ جو بہاول پور کے مسائل حل کریں۔