اسلامیہ یونیورسٹی بہاولپور طلباء وطالبات کو اعلیٰ تعلیم تک رسائی کے زیادہ سے زیادہ مواقع فراہم کر رہی ہے,ڈاکٹر اطہرمحبوب

بہاول پور( علی رضا غوری سے )وائس چانسلر اسلامیہ یونیورسٹی بہاولپور انجینئر پروفیسر ڈاکٹر اطہرمحبوب نے کہا ہے کہ موجودہ مالیاتی سال کے دوران جامعہ اسلامیہ میں 7ارب روپے مالیت کے ترقیاتی پروگرام جاری ہیں۔ وائس چانسلر نے اس بات کا اظہار گزشتہ روز ریڈیو پاکستان لاہور میں کنٹرولر نیوزپنجاب سجادپرویز کے ساتھ حالات حاضرہ کے پروگرام لاہور ان سائٹ میں کیا۔ اس پروگرام کے ایگزیکٹو پروڈیوسر عبدالرئوف ہیں۔ انجینئر پروفیسر ڈاکٹر اطہر محبوب نے کہا کہ اسلامیہ یونیورسٹی بہاولپور طلباء وطالبات کو اعلیٰ تعلیم تک رسائی کے زیادہ سے زیادہ مواقع فراہم کر رہی ہے۔ اس سلسلے میں احمد پور شرقیہ اور لیاقت پور کی تحصیلوںمیں بھی نئے سب کیمپسز قائم کیے جا رہے ہیں۔ ایک سوال کے جواب میں وائس چانسلر نے کہا کہ یونیورسٹی کی بڑھتی ہوئی توانائی کی ضروریات کے پیش نظر متبادل توانائی کے منصوبوں پر کام جاری ہے۔ اس سلسلے میں 2.5میگا واٹ سولر پاور پلانٹ نے پیداوار کا آغاز کر دیا ہے اور بغداد الجد ید کیمپس میں شمسی توانائی سے بجلی کی فراہمی جاری ہے۔ وائس چانسلر نے یہ بھی بتایا کہ اسلامیہ یونیورسٹی بہاولپور کا 17واں کانووکیشن 28جنوری کو بغدادالجدید کیمپس میں ہوگا۔ کانووکیشن کی صدارت چانسلر و گورنر پنجاب چوہدری محمد سرور کریں گے ۔ اس موقع پر 1150سے زائد پی ایچ ڈی ، ایم فل اور گریجویٹس طلباء وطالبات کو ڈگریاں اور میڈلز عطاکیے جائیں گے۔