تعمیراتی کاموں کے معیار کی سخت مانیٹرنگ کی جائے اور نگران افسران فیلڈ وزٹ تواتر کے ساتھ کریں،کمشنر بہاول پورکیپٹن محمد ظفر اقبال
بہاول پور(قاری عاشق حسین سے )کمشنر بہاول پور ڈویژن کیپٹن محمد ظفر اقبال کی زیر صدارت ڈویژنل ڈویلپمنٹ ورکنگ پارٹی کا اجلاس منعقد ہوا۔ کمشنر بہاول پور ڈویژن کیپٹن محمد ظفر اقبال نے جاری ترقیاتی سکیموں کا جائزہ لیتے ہوئے ہدایت کی کہ ترقیاتی منصوبوں کی بروقت تکمیل کے لئے تمام تر اقدامات بروئے کار لائے جائیں۔انہوں نے کہا کہ طے شدہ اہداف کے مطابق ترقیاتی کاموں کی مانیٹرنگ کے عمل کو موثر بنایا جائے تاکہ ترقی کے ثمرات سے عوام کو بہرہ مند کیا جا ئے۔انہوں نے کہا کہ ترقیاتی منصوبوں کی تکمیل میں غیر ضروری التوا سے لاگت میں اضافہ ہو جاتا ہے ۔ اس لئے مقررہ اہداف کی مقررہ میعاد میں تکمیل کو ہر صورت یقینی بنایا جائے۔انہوں نے کہا کہ تعمیراتی کاموں کے معیار کی سخت مانیٹرنگ کی جائے اور نگران افسران فیلڈ وزٹ تواتر کے ساتھ کریں تاکہ ترقیاتی منصوبہ جات میں شفافیت کو برقرار رکھتے ہوئے انہیں پایہ تکمیل تک پہنچایا جا سکے۔ ویڈیو لنک اجلاس میں ڈپٹی کمشنر بہاول نگر کیپٹن(ر) محمد وسیم، ڈائریکٹر ڈویلپمنٹ اینڈ فنانس طالب رندھاوا، ڈپٹی ڈائریکٹر ڈویلپمنٹ ملک محبوب الٰہی کھر، ایکسئن ہائی ویز فرخ ممتاز سمیت دیگر متعلقہ محکموں کے افسران شریک ہوئے۔
