بھاولپور پولیس افسران کیلئے سائبرسکیورٹی ٹریننگ کا انعقاد
بھاولپور (حبیب الرحمن سے )پولیس لائن بہاولپور میں ضلع بہاولپور کے ڈی ایس پیز، ایس ایچ اوز و دیگر افسران کے لیے سائبر سکیورٹی ٹریننگ کا انعقاد کیا گیا جس میں سابق ایڈیشنل ڈائریکٹر جنرل آف پاکستان ایف آئی اے سید عمار حسین جعفری، سائبر سکیورٹی ایکسپرٹس محمد اسد الرحمن اور فہد اقبال نے افسران کو ٹریننگ دی کہ سائبر سپیس میں مجرموں کو کیسے پکڑا جا سکتا ہے۔اس موقع پر انہوں نے کہا کہ موجودہ دور میں مجرم جدید ٹیکنالوجی کا استعمال کرتے ہیں جس کی وجہ سے پولیس افسران کو تحقیقات میں بہت مشکلات کا سامنا کرنا پڑتا ہے لہذا پولیس کو بھی جدید ٹیکنالوجی کی ٹریننگ ہونی چاہیے۔ اس موقع پر سائبر سکیورٹی ایکسپرٹ محمد اسد الرحمن نے بتا یا کہ کس طرح جدید ٹیکنالوجی کا استعمال کرتے ہوئے مجرم ہمارے موبائل، کمپیوٹر تک رسائی حاصل کرتے ہوئے با آسانی ہماری تمام معلومات و ڈیٹا چوری کر سکتے ہیں۔ لہذا سائبر سپیس میں مجرم کو ڈھونڈتے ہوئے پہلے اپنے ڈیٹا و انفارمیشن کی حفاظت کو یقینی بنائیں۔ سائبر ایکسپرٹ فہد اقبال نے ڈارک ویب کا تعارف کرواتے ہوئے بتایا کہ مجرمانہ کاروائیوں کے لیے جرائم پیشہ افراد ڈارک ویب کاسہارا لیتے ہیں تا کہ وہ اپنی پہچان چھپا سکیں۔