ضمنی انتخاب: راجن پوراین اے193 میں تحریک انصاف کےامیدوارکا پلڑا بھاری
یوتھ ویژن نیوز: راجن پور کے قومی اسمبلی کے حلقہ این اے 193 میں ضمنی انتخاب کے غیرحتمی ،غیرسرکاری نتائج آنا شروع ہو گئے۔ تحریک انصاف کاامیدوار پہلے اور ن لیگ کا امیدوار دوسرے نمبرپرہے۔
237 میں سے122 پولنگ سٹیشن کا غیر حتمی اور غیر سرکاری نتیجہ موصول ہو گیا جس کے مطابق پاکستان تحریک انصاف کے محسن لغاری44ہزار406ووٹ لیکر آگے ہے جبکہ مسلم لیگ (ن) کے عمار لغاری 25 ہزار 270ووٹوں کے ساتھ دوسرے نمبر پر ہیں۔ اسی طرح پیپلزپارٹی کے امیدوار اختر حسن گورچانی 8ہزار174 ووٹوں کے ساتھ تیسرے نمبر پر ہیں۔
تفصیلات کے مطابق حلقہ این اے 193 میں ضمنی انتخاب کیلئے صبح 8 بجے شروع ہونے والی پولنگ کا عمل بغیر کسی وقفے کے شام 5 بجے تک جاری رہا۔ 3 لاکھ 79 ہزار 204 ووٹرز نے حق رائے دہی استعمال کیا۔
ضمنی الیکشن میں 11 امیدوار میدان میں ہیں تاہم اصل مقابلہ ن لیگ اور پی ٹی آئی کے درمیان ہے۔ پی ٹی آئی کے محسن لغاری اور ن لیگ کے عمار لغاری میں زور کا جوڑ پڑے گا، پیپلزپارٹی کے اختر حسن گورچانی بھی امیدوار ہیں۔
الیکشن کمیشن کی جانب سے حلقے میں ووٹنگ کیلئے 237 پولنگ سٹیشن قائم کیے گئے جن میں سے 68 کو حساس قرار دیا گیا۔کسی بھی ناخوشگوار صورتحال سے نمٹنے کیلئے 2 ہزار 650 پولیس اہلکار تعینات ہوئے ۔رینجرز اور آرمی کے جوان بھی گشت کرتے رہے۔
واضح رہے کہ راجن پور کے حلقہ این اے 193 کی نشست پاکستان تحریک انصاف کے رکن قومی اسمبلی سردار جعفر لغاری کے انتقال پر خالی ہوئی تھی۔ یاد رہے کہ اس سے قبل پنجاب حکومت نے این اے 193 کا ضمنی انتخاب ملتوی کرنے کی درخواست کی تھی۔